ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) ގެ އިސްވެރިން އެންވަޔަރަންމަންޓް މިނިސްޓަރު އަލީ ޝަރީފާ ބައްދަލުކުރައްވައިފި އެވެ.
އެންވަޔަރަންމަންޓް މިނިސްޓްރީގައި އިއްޔެ ބޭއްވި މި ބައްދަލުވުމުގައި އެންޑީއެމްއޭގެ ޗީފް އެގްޒެކެޓިވް ހިސާން ހަސަނާއި އެ އޮތޯރިޓީގެ އިސް މެނޭޖްމަންޓް ޓީމުން ބައިވެރިވި އެވެ.
އެ މިނިސްޓްރީން ބުނީ ބައްދަލުވުމުގެ މައިގަނޑު މަގުސަދަކީ ދެ މުއައްސަސާ ގުޅިގެން ކުރިއަށްގެންދާ މުހިންމު މަސައްކަތްތަކާ ބެހޭގޮތުން މަޝްވަރާކުރުމާއި، ގުޅުން ބަދަހިކުރުން ކަމަށެވެ.
މި ބައްދަލުވުމުގައި، ކާރިސީ ހިރާސް ކުޑަކުރުމަށާއި މޫސުމަށް އަންނަ ބަދަލުތަކަށް ހޭނުމުގެ ދާއިރާއިން މިހާރު ކުރިއަށްދާ މުހިންމު މަސައްކަތްތަކާ ބެހޭގޮތުން ތަފްސީލީ ގޮތެއްގައި ވާހަކަދެކެވުނެވެ. އަދި މި ދާއިރާތަކުން ދެ މުއައްސަސާގެ މެދުގައި އޮންނަ ގުޅުން އިތުރަށް ހަރުދަނާކޮށް، އެއްބާރުލުން އިތުރުކުރެވޭނެ ގޮތްތަކާ ބެހޭގޮތުން ވެސް މަޝްވަރާ ކުރެވުނެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ތިމާވެށި ރައްކާތެރިކުރުމަށާއި، ކާރިސާތަކުން ލިބޭ ގެއްލުންތައް ކުޑަކުރުމަށް ކުރަމުންދާ މަސައްކަތްތަކުގެ ތެރެއިން، މިފަދަ ބައްދަލުވުންތަކަކީ ދެ މުއައްސަސާގެ ދައުރު ފުރިހަމައަށް އަދާކުރުމަށް މަގުފަހިވެގެންދާނެ ކަމެއްކަން ދެ ފަރާތުން ވެސް ފާހަގަ ކުރެއްވި އެވެ.
އެންޑީއެމްއޭގެ އިސްވެރިންގެ އިތުރުން އެންވަޔަރަންމަންޓް މިނިސްޓްރީގެ ބައެއް އިސް ބޭފުޅުންވެސް އެ ބައްދަލުވުމުގައި ބައިވެރިވެވަޑައިގެންނެވި އެވެ.
ކޮމެންޓް