ދައުލަތަށް ނުލިބި ހުރި ފައިސާ ރިކަވާ ކުރުމަށް ކުރަމުން އަންނަ މަސައްކަތުގެ ތެރެއިން މިދިޔަ މަހު 543 މިލިއަން ރުފިޔާ ހޯދާފައިވާ ކަމަށް މީރާއިން ބުނެފި އެވެ.
ދައުލަތުގެ ޓެކްސް އިދާރާ، މީރާގެ މިދިޔަ މަހުގެ ރިޕޯޓުގައިވާ ގޮތުން ފައިސާ ދައްކަން ޖެހޭ ފަރާތްތަކަށް ގުޅައިގެން 543 މިލިއަން ރުފިޔާ ހޯދާފައިވާއިރު، މި ފައިސާ ހޯދާފައިވަނީ ނޯޓިސް ފޮނުވައިގެންނާއި ޑިއުސް ކްލިއަރެންސް އަދި އިންސްޓޯލްމަންޓް އެއްބަސްވުންތަކުގެ އިތުރުން އެކްޝަން ޕޮލިސީގެ ދަށުންނެވެ.
މީރާއިން ފައިސާ ހޯދަން އެޅި ފިޔަވަޅުތައް:
1. ނޯޓިސް ފޮނުވައިގެން: 372 މިލިއަން ރުފިޔާ
2. ޑިއުސް ކްލިއަރެންސް: 96 މިލިއަން ރުފިޔާ
3. އިންސްޓޯލްމަންޓް އެއްބަސްވުމުގެ ދަށުން: 64 މިލިއަން ރުފިޔާ
4. ހަނދާންކޮށްދިނުމަށް ކުރި ފޯން ކޯލްތަކުން: 5 މިލިއަން ރުފިޔާ
5. އެކްޝަން ޕޮލިސީ: 4 މިލިއަން ރުފިޔާ
މީރާއިން ވަނީ މިދިޔަ މަހު ވެސް ކުންފުނިތަކާއި އަމިއްލަ ފަރުދުން ނޫން ފަރާތްތަކުގެ އިންކަމް ޓެކުހާއި ފަރުދުންގެ އާމްދަނީން ނެގޭ ޓެކުހުގެ ބަޔާން ހުށަނާޅާ 48 ފަރާތެއްގެ ނަން އާންމުކޮށްފަ އެވެ. މި ލިސްޓުގައި ހިމެނެނީ 2024 ވަނަ އަހަރުގެ ޑިސެމްބަރު މަހުގެ ނިޔަލަށް ޓެކްސް ބަޔާން ހުށަނާޅާ ފަރާތްތަކެވެ. މީގެ ތެރޭގައި ކުންފުނިތަކާއި އެ ނޫން ވެސް ފިޔަފާރި ކުރާ ފަރާތްތައް ހިމެނެ އެވެ.
ކޮމެންޓް