ރައްޔިތުންގެ މަޖިލީހުގެ ތެރެއިން ރައީސް ޑރ. މުހައްމަދު މުއިއްޒުގެ އިތުބާރު ނެތްކަމުގެ ވޯޓެއް ނެގުމުގެ އެއްވެސް ފުރުސަތެއް ނުދޭނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް މި ގޮތަށް ވިދާޅުވީ ހިތަދޫ އުތުރު ދާއިރާގެ ބައި-އިލެކްޝަންގައި ވާދަ ކުރައްވައި ކެންޑިޑޭޓް އަހުމަދު ސައީދު (ސޮޑާ) ގެ ކެމްޕޭން ފެށުމަށް އައްޑޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ ރައްޔިތުންނަށް ނަނާ ހުވަފެން ދައްކައިގެން މަޖިލީހުގެ ތެރެއިން ރައީސް ޑރ. މުއިއްޒުގެ އިތުބާރު ނެތްކަމުގެ ވޯޓެއް ނުނެގޭނެ ކަމަށެވެ.
"އެކަން ކުރާކަން އަޅުގަނޑުމެން ފުރުސަތެއް ނުދޭނަން. ރައްޔިތުން ހައްލަން ރައްޔިތުން ވާ ވައްދަން ރައްޔިތުންނަށް އަވާމެންދުރު ދައްކަން ބޭނުންހާ ވާހަކައެއް ދައްކައިގެން ހޯދޭނެ ކާމިޔާބެއް ކުރިއެރުމެއް ނޯންނާނެ. ރައްޔިތުން ތިބީ ތިބޭފުޅުންނާ އެކީގައެއް ނޫނޭ. ރައްޔިތުން ތިބީ ރައީސް ޑރ. މުއިއްޒުއާ އެކީގައި. މި ސަރުކާރާ އެކީގައި. ޕީއެންސީއާ އެކީގައި،" އެމަނިކުފާނު ވިދާޅުވި އެވެ.
އަބްދުއްރަހީމް ވިދާޅުވީ ރައީސް ޑރ. މުއިއްޒުގެ އިތުބާރު ނެތްކަމުގެ ވޯޓުގައި ނުވަތަ އެ ޕެޓިޝަންގައި އެންމެ ފުރަތަމަ ސޮއި ކުރާނެ މެންބަރެއް ރައްޔިތުންގެ މަޖިލީހަށް މިހާރު ބޭނުން ނުވާ ކަމަށެވެ. އަދި ވިދާޅުވީ އެތަނަށް ބޭނުން ވަނީ ރާއްޖޭގެ ތަރައްގީއަށް ރައީސް ގެންގުޅުއްވާ ތަސައްވަރު ހަގީގަތަށް ހެދުމުގެ ދަތުރުގައި ވައިވެރިވާނެ ފަޅުވެރިއެއް ނުވަތަ އެމްޕީއެއް ކަމަށެވެ.
"އެ ދަތުރަށް ބޭނުންވާ އެމްޕީއެއް ނުވަތަ ފަޅުވެރިއެއް ނުވަތަ ބައިވެރިއެއް އަޅުގަނޑުމެން ބޭނުން ވަނީ. އެ ބައިވެރިއަކަށް އެ އެމްޕީއަކަށް ވާންވީ އަޅުގަނޑުމެންގެ ކެންޑިޑޭޓު އަހުމަދު ސައީދު ކެންޑިޑޭޓް ނަމްބަރު 1 "ސޮޑާ" އޭ،"
މާޒީން އިބުރާތް ހާސިލުކޮށްފި ނަމަ ވޯޓު ދޭނީ ސޮޑާއަށް ކަމަށް އަދުރޭ ވިދާޅުވި އެވެ. އަދި ދައުލަތުގެ މުދަލުގައި ހުޅުޖަހާ އަންދާލުގައި އެންމެ އަޑީގައި ހުރި މޭސްތިރިއަކު ރައްޔިތުންގެ މަޖިލީހަށް ފޮނުވަން އައްޑޫ ރައްޔިތުން ބޭނުން ނުވާނެ ކަމަށް ވެސް އެމަނިކުފާނު ވިދާޅުވި އެވެ.
ކޮމެންޓް