ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއެކު ޕީއެންސީގެ ޕީޖީ ގްރޫޕް ސާބިތުވެ ތިބިކަމަށާއި ފިތުނަ އުފައްދައިގެން އެ ޕާޓީ ބައިބައި ނުކުރެވޭނެކަމަށް ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
“އަދަދު” ނޫހުން ޕީއެންސީގެ ޕީޖީ ގްރޫޕުން ރައީސް މުއިއްޒުގެ ހުށަހެޅުމެއް ބޭރުކޮށްލައި އެމަނިކުފާނުގެ ނުފޫޒު ޕީޖީ ގްރޫޕުން ކުޑަކޮށްފައިވާކަމަށް ބުނެ ލިޔެފައިވާ ހަބަރަކަށް ރައްދު ދެއްވައި އަދުރޭ ވިދާޅުވީ އެ ވާހަކައަކީ ކަނޑައެޅިގެން ހަގީގަތާ ހިލާފު ވާހަކައެއްކަމަށެވެ.
މީގެ އިތުރުން އަދުރޭ ވިދާޅުވީ ޕީޖީ ގްރޫޕުން ވަކި ގޮތަކަށް ކަމެއް ކުރުމަށް ރައީސް މުއިޒުގެ ފަރާތުން ހުށަހެޅުމެއް ވެސް ހުށަހަޅާފައި ނުވާކަމަށެވެ. އެފަދަ ވާހަކަތަކަކީ އެ ޕާޓީ ބައިބައިކުރަން ދައްކާ ވާހަކަތަކެއް ކަމަށް ވެސް އަދުރޭ ވިދާޅުވިއެވެ.
ޕީއެންސީއަކީ ޑިމޮކްރަސީގެ ރީތި ހަމަތަކާއި އުސޫލުތަކުގެ ތެރެއިން ހިންގާ ޕާޓީއެއްކަމަށް ވެސް އަދުރޭ ވިދާޅުވިއެވެ. އިތުރަށް އަދުރޭ ވިދާޅުވީ އެ ޕާޓީގެ ޕީޖީ ގްރޫޕް ރައީސްއާއެކު ސާބިތުވެ ތިބިކަމަށެވެ.
އަދަދު ނޫހުން ރިޕޯޓު ކޮށްފައިވަނީ އެ ޕާޓީގެ ސެނެޓް ބައްދަލުވުމެއްގައި ރައީސް މުއިއްޒު ވަނީ ކުރިއަށް އޮތް އެ ޕާޓީގެ ކޮންގްރެސްގެ އިންތިޒާމުތަކެއް ކުރިއަށް ގެންދިއުމުގެ ބާރު ޕާޓީގެ ލީޑަޝިޕަށް ދިނުމަށް ހުށަހަޅާފަކަމަށެވެ. ނަމަވެސް އެ ޕާޓީގެ ސެނެޓުން އެކަން ބޭރުކޮށްލައިފައިވާކަމަށް ވެސް އެ ނޫހުން ރިޕޯޓުކުރިއެވެ.
ނަމަވެސް ޕީއެންސީގެ ޕީޖީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު މުހައްމަދު ފަލާހު ވެސް ވަނީ އަދަދު ނޫހުން ލިޔުނު އެ ހަބަރަކީ ދޮގު ހަބަރެއްކަަމަށް ބުނެފައެވެ.
ކޮމެންޓް