ޗައިނާގެ ޝާންޝީ ޕްރޮވިންސުގައި ކޯލް މައިނެއް ގޮވައި ހިނގި ގޭސް އެކްސްޕްލޯޝަންގެ ހާދިސާގައި ގިނަ ބަޔަކު މަރުވުމުން އެކަމާ ހިތާމަ ފައުޅު ކުރައްވައި ރައީސް ޑރ. މުހައްމަދު މުއިއްޒު ތައުޒިޔާ ފޮނުއްވައިފި އެވެ.
ދަ ގާޑިއަނުން ރިޕޯޓުކޮށްފައިވާ ގޮތުގައި މި ހާދިސާގައި 82 މީހުން މަރުވެ، ޒަހަމްވި އެތައް ބަޔަކަށް އަންނަނީ ހޮސްޕިޓަލްގައި ފަރުވާ ދެމުންނެވެ.
މި ހާދިސާއާ ގުޅިގެން ރައީސް ކުރެއްވި އެކްސް ޕޯސްޓެއްގައި މި ހާދިސާގައި އެތައް ބަޔަކު މަރުވެ، އަދި ގިނަ ބަޔަކަށް އަނިޔާ ލިބިފައިވާތީ އެކަމާ ހިތާމަ ކުރައްވާ ކަމުގައި ބަޔާން ކުރައްވާފައިވެ އެވެ. އަދި މި ހާދިސާގައި މަރުވި މީހުންގެ އާއިލާ ތަކަށާއި، ޗައިނާ ސަރުކާރަށާ ރައްޔިތުންނަށް، ދިވެހި ސަރުކާރާ ރައްޔިތުންގެ ނަމުގައި އިހުލާސްތެރިކަމާ އެކު، ތައުޒިޔާ ފޮނުއްވާފައިވެ އެވެ.
އެމަނިކުފާނު މެސުޖުގައި، ހިތާމައިގެ މި ދަނޑިވަޅުގައި ރާއްޖެ ޗައިނާއާ އެކުގައި ވާކަން ފާހަގަ ކުރައްވައި، މި ހާދިސާގައި ގެއްލުން ލިބުނު ހުރިހާ ފަރާތްތަކަށް، ކެތްތެރިކަމާ ސާބިތުކަން ދެއްވުމަށާ، އަދި މީހުން ސަލާމަތް ކުރުމަށް ކުރެވެމުންދާ މަސައްކަތަށް ކާމިޔާބު ލިބުމަށް އެދިވަޑައިގެންފައިވެ އެވެ.
ކޮމެންޓް