ވ. އަތޮޅުގައި ފީނަން ދިޔަ ޑައިވަރުންގެ ތެރެއިން ގެއްލުނު ހަތަރު ޑައިވަރުން ހޯދުމަށް އެމްއެންޑީއެފުން ކުރިއަށްގެންދާ ސާޗް އެންޑް ރެސްކިޔު އޮޕަރޭޝަނުގައި މިއަދު ޑައިވްކުރަނިކޮށް ނިޔާވި، އެމްއެންޑީއެފްގެ ސާޖަންޓް ފަސްޓް ކުލާސް މުހައްމަދު މަހުދީގެ ޖަނާޒާ ސިފައިންގެ ރަސްމީ އިއްޒަތުގައި ބާއްވައިފި އެވެ.
މަހުދީގެ މައްޗަށް ކަށުނަމާދު ކޮށްފައިވަނީ މިރޭ 22:00ގައި އިސްލާމީ މަރުކަޒުގަ އެވެ. އަދި، މައްޔިތާ ފަސްދާނުލާފައިވަނީ މައްޗަންގޮޅީ އާސަހަރާގަ އެވެ.
މި ޖަނާޒާގައި ބައިވެރިވެލައްވައި، ރައީސް ޑރ. މުހައްމަދު މުއިއްޒުއާ ޑިފެންސް މިނިސްޓަރު ހަސަން ރަޝީދުއާ، ދިވެހި ދައުލަތުގެ އިސްވެރިންނާއި، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީއާ، ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަހުމަދު އިޔާޒުއާ ޖެނެރަލް އޮފިސަރުންނާއި، ސިފައިންގެއަށް ކުރިން ހިދުމަތް ކޮށްދީފައިވާ ބޭފުޅުން އަދި، ގިނަ އަދަދެއްގެ ސިފައިން ވަނީ މަހުދީގެ އާއިލާއަށް ތައުޒިޔާ ދަންނަވާފަ އެވެ.
މި ޖަނާޒާގައި، މަހުދީގެ މޫނު ދެއްކުން ކުރިއަށްދިޔަ ވަގުތު، ސިފައިން ވަނީ ސަންދޯއް ކައިރީ ގާޑް މައުންޓްކޮށްފައެވެ.
އިސްލާމީ މަރުކަޒުގައި ކުރެވުނު ކަށުނަމާދަށް ފަހު، ސަންދޯއް އުފުލާފައިވަނީ ސިފައިންގެ ސަންދޯއްވެރިންގެ ކޮނޑުމަތީގަ އެވެ. އަދި، ސަންދޯއް ވަޅުލުމުގެ ކުރިން، ސަންދޯކުގައި އަޅާފައި އޮތް ގައުމީ ދިދަ، މަހުދީގެ އާއިލާއާ ވަނީ ހަވާލު ކޮށްދެއްވާފަ އެވެ.
ގިނަ އަދަދެއްގެ ސިފައިން ބައިވެރިވި މި ޖަނާޒާގައި ސިފައިން ވަނީ ހަތްބަޑީގެ ސަލާމާއި، ރަސްމީ ކުރުނީހެއް އަރުވާފަ އެވެ.
ކޮމެންޓް