ނޫސްވެރިޔާ އަހުމަދު ރިލްވާން ވަގަށް ނަގައި ގެއްލުވައިލި ކަމުގެ ތުހުމަތަށް ބަންދުކޮށްފައި ތިބި ފަރާތްތަތައް ބަންދުން ދޫކޮށްލި މައްސަލައިގައި ރައީސް އިބްރާހީމް މުހައްމަދު ސޯލިހު އިތުރުފުޅު ހައްދައިފި އެވެ.
ނޫސްވެރިކަމުގެ މިނިވަންކަން ދިފާއު ކުރުމަށް ޓަކައި އެކުގައި މަސައްކަތްކުރުމަށް ކުރީގެ ތިން ރައީސުން ކަމުގައިވާ މުހައްމަދު ނަޝީދާއި އިބްރާހީމް މުހައްމަދު ސޯލިހު އަދި އަބްދުﷲ ޔާމީން، މަޝްވަރާ ކުރެއްވުމަށް ފަހު ރޭ ވަނީ ނޫސްވެރިންނާ ބައްދަލު ކުރައްވާފަ އެވެ.
އެ ބައްދަލުވުމުގައި ސޯލިހު ވިދާޅުވީ އެމަނިކުފާނުގެ ވެރިކަމުގައި ރިލްވާން ގެއްލުނު މައްސަލައިގެ ތަހުގީގުކޮށް އޭގެ ތެރެއިން ތުހުމަތު ކުރެވޭ ތިނެއް ނޫނީ ހަތަރު މީހަކު ޝަރީއަތް ނިމެންދެން ޖަލަށް ލާފައިވާނެ ކަމަށެވެ. އަދި އެމީހުން ބަންދުން ދޫކޮށްލީ މި ސަރުކާރުން ކަމަށް ވިދާޅުވި އެވެ.
ރައީސް ސޯލިހު މިހެން ވިދާޅުވެފައިވާ ވިދާޅުވުމަށް ރައްދު ދެއްވައި އެޓާނީ ޖެނެރަލް އަހުމަދު އުޝާމް ކުރެއްވި އެކްސް ޕޯސްޓެއްގައި ވިދާޅުވީ ނޫސްވެރިޔާ ރިލްވާންގެ މައްސަލާގައި ތުހުމަތު ކުރެވޭ ފަރާތްތައް ބަންދުން ދޫކޮށްލާފައިވަނީ މިސަރުކާރުން ކަމަށް ވިދާޅުވެ ރައީސް ސޯލިހު ރޭގައި ދެއްކެވި ވާހަކަފުޅަކީ ކަނޑައެޅިގެން ހެއްދެވި އިތުރުފުޅެއް ކަމަށެވެ.
އުޝާމް ވިދާޅުވީ އެފަރާތްތައް ބަންދުން ދޫކޮށްލާފައިވަނީ 2023 ވަނަ އަހަރު އިންތިހާބުގެ ދުވަސްވަރު ކަމަށާއި އެންމެ ފަހުން ބަންދުގައި ހުރި ފަރާތް ދޫކޮށްލާފައިވަނީ އެ އަހަރުގެ ސެޕްޓެމްބަރު 19 ވަނަ ދުވަހު ކަމަށެވެ.
އެޓާނީ ޖެނެރަލް އުޝާމް އިތުރަށް ވިދާޅުވީ ސާފުކޮށް ފެންނަން ހުންނަ އެ ޒާތުގެ ކަންކަމުގައި ވެސް ރައްޔިތުންނަށް އޮޅުވާލުމަށް ހަގީގަތާ ހިލާފު ވާހަކަތައް ދެއްކެވުމަކީ ދެރަ ކަމެއް ކަމަށެވެ.
ކޮމެންޓް