ސާފް ފުޓްސަލް ޗެމްޕިއަންޝިޕް 2026 ގައި ވާދަކުރާ ގައުމީ ފިރިހެން ޓީމު މާދަމާ ކުޅޭ މެޗަށް ފުރިހަމަ ކާމިޔާބީއަށް އެދިވަޑައިގެން ނައިބު ރައީސް ހުސައިން މުހައްމައު ލަތީފް، ޓީމަށް ހިތްވަރު ދެއްވައިފި އެވެ.
ޕީއެސްއެމަށް ދެއްވި އިންޓަވިއުއެއްގައި ގައުމީ ޓީމުގައި ތިބީ ހުނަރުވެރި ކުޅުންތެރިން ކަމަށާއި މިހާރު ވެސް ޓީމުން ހޯދަމުން ދާ ނަތީޖާ ތަކަކީ އުއްމީދު ކުރެއްވި ނަތީޖާ ތަކެއްކަން ފާހަގަ ކުރައްވައި ޓީމާއި މެދު އެ މަނިކުފާނު ފަހުރުވެރިވެވަޑައިގަންނަވާ ކަމަށް ވިދާޅުވި އެވެ. މި މުބާރާތަށް ކުޅުންތެރިން ތަމްރީނު ކޮށްދިނުމަށް ޓީމުގެ ކޯޗު ކޮށްދިން މަސައްކަތް ވެސް ނައިބު ރައީސް ފާހަގަ ކުރެއްވި އެވެ.
ދިވެހިންނަކީ ކުޅިވަރުގައި އަބަދު ވެސް އެއްބައިވަންތަ ކަން ދައްކަމުންދާ ބައެއްކަން ފާހަގަ ކުރައްވައި އެ މަނިކުފާނު ވިދާޅުވީ މާދަމާ ރާއްޖޭގެ ޓީމް ކުޅޭ މެޗްގައި ޓީމާއި އެކު ރައްޔިތުން ތިބިކަމުގެ ޝުއޫރާއި ފޯރި ރާއްޖޭގެ އެކި ކަންކޮޅު ތަކުން ދައްކަމުންދާ ކަމަށާއި މެޗުގެ ކާމިޔާބީއަށް ދިވެހިން ކެތްމަދުވެފައިވާ ކަމަށް އެ މަނިކުފާނު ވިދާޅުވި އެވެ.
މި މުބާރާތުގައި ވާދަކުރި ރާއްޖޭގެ ގައުމީ އަންހެން ޓީމުން ދެއްކި ހިތްވަރު ގަދަ ކުޅުމަށް ސާބަސް ދެއްވަމުން އެ މަނިކުފާނު ވަނީ ކުރިއަށް އޮތްތަނުގައި ޓީމަށް އިތުރު ފުރުސަތުތަކެއް ލިބި، ކާމިޔާބީއަށް އެދިވަޑައިގެންފަ އެވެ.
ތައިލޭންޑްގައި މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕް 2026 ގައި ރާއްޖެއިން ކުޅުނު ހަތަރު މެޗުން ވެސް ވަނީ މޮޅުވެފަ އެވެ.
މާދަމާ ބޫޓާނާ ބައްދަލު ކުރާ މެޗުން މޮޅުވެއްޖެ ނަމަ ރާއްޖެއަށް މި މުބާރާތުގެ ޗެމްޕިއަންކަން ކަށަވަރު ވާނެ އެވެ.
ކޮމެންޓް