މި ސަރުކާރަށް ދެ އަހަރު ވީއިރު، ސްޓޫޑެންޓް ލޯނުގެ ގޮތުގައި ބިލިއަނަކަށްވުރެ ގިނަ ރުފިޔާ ދޫކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދު ފާހަގަ ކުރަމުން އަންނަ ބައިނަލްއަގުވާމީ ތައުލީމީ ދުވަހާ ގުޅުވައިގެން އެމަނިކުފާނު ކުރެއްވި އެކްސް ޕޯސްޓެއްގައި ވިދާޅުވީ މި ދުވަސް ފާހަގަ ކުރަމުންދާއިރު ތައުލީމަކީ ދެމެހެއްޓިނިވި ތަރައްގީ އާއި ދުނިޔޭގެ ކުރިއެރުމުގެ ބިންގާ ކަން އަބަދުމެ ހަނދާން ކުރާންޖެހޭ ކަމަށެވެ.
ތައުލީމީ ނިޒާމު ބައްޓަން ކުރުމުގައި އެންމެންގެ ބައިވެރިވުން އިތުރުކޮށް ތައުލީމާ ގުޅޭ ކަންކަމުގައި ޒުވާނުންގެ ބައިވެރިވުން އިތުރުކުރުމާ އެކު، އެ ފަރާތްތައް ބާރުވެރި ކުރުވުމަކީ މި ސަރުކާރުގެ ވައުދެއް ކަމަށް ވެސް ރައީސް ވިދާޅުވި އެވެ. އަދި ތައުލީމަކީ ގައުމީ ތަރައްގީގެ އެންމެ މުހިންމު އެއް ތަނބުގެ ގޮތުގައި މި ސަރުކާރުން ކަނޑައަޅާފައިވާ ކަމަށް ވެސް އެ މަނިކުފާނު ވިދާޅުވި އެވެ.
ރައީސް ވިދާޅުވީ ފާއިތުވި ދެ އަހަރު ދުވަހުގެ ތެރޭ ހިލޭ ފުރަތަމަ ޑިގްރީ ސްކީމުގެ ދަށުން 6,000 އަށްވުރެ ގިނަ ދަރިވަރުން ތައުލީމު ހާސިލުކޮށްފައިވާ ކަމަށާއި އަދި ދަރިވަރުންގެ ލޯނުގެ ގޮތުގައި 1 ބިލިއަނަށްވުރެ ގިނަ ރުފިޔާ ދެ އަހަރު ތެރޭ މި ސަރުކާރުން ދޫކޮށްފައިވާ ކަމަށެވެ.
ދަރިވަރުންގެ ކުރިއެރުމަށް އިންވެސްޓްކޮށް ތައުލީމީ ފުރުސަތުތައް ފުޅާ ކުރުމަކީ ހަމައެކަނި ވަކި ބައެއްގެ މުސްތަގުބަލު ބައްޓަން ކުރުން ނޫންކަން ފާހަގަ ކުރައްމުން ރައީސް ވިދާޅުވީ އެއީ މުއްސަނދި، ހަމަހަމަކަން ގާއިމުވުމާ އެކު ކަންކަމަށް ކުރިމަތިލުމުގެ ގާބިލުކަން ހުރި ގައުމެއް ބިނާ ކުރުން ކަމަށެވެ.
ރައީސް ޑރ. މުއިއްޒުގެ ޕޯސްޓުގައި އިތުރަށް ވިދާޅުވީ އެންމެން ގުޅިގެން މަސައްކަތްކޮށް، ކޮންމެ ކުއްޖަކަށް ވެސް ކުރިއަރައިދިއުމުގެ ފުރުސަތު ހޯދައިދީ ގައުމީ ތަރައްގީގައި ބައިވެރިވުމުގެ މަގު ފަހިކޮށްދިނުމަކީ މި ސަރުކާރުން ކުރާނެ ކަމެއް ކަމަށެވެ.
ކޮމެންޓް