އައު މެންބަރުންނާއެކު ޕެރޯލް ބޯޑު އެކުލަވާލައިފި

ކުށްވެރިން ޖަލުން ދޫކޮށްލުމާއި ބަންދުން ލުއި ދިނުމާ މެދު ގޮތް ނިންމާ ޕެރޯލް ބޯޑު، އާ މެންބަރުންނާއެކު އަލުން އެކުލަވާލައިފި އެވެ.

ރައީސް އޮފީހުން މިދިޔަ ހަފުތާގެ ހޯމަ ދުވަހު ހުރިހާ މެންބަރުން އައްޔަންކޮށް، 9 މެންބަރުންގެ މައްޗަށް އެކުލެވޭ ޕެރޯލް ބޯޑު އަލުން އުފައްދާފައިވާއިރު އެ ބޯޑުގައި ހިމެނޭ މެންބަރުންގެ ތަފްސީލުތައް އަދި ހާމަކޮށްފައެއް ނުވެއެވެ. އަދި ކުރިން ބޯޑު އުވާލިއިރު ވަކިނުކޮށް ތިބި 3 މެންބަރުން ޕެރޯލް ބޯޑު އަލުން އެކުލަވާލިއިރުވެސް ހިމެނެއެވެ.

ޕެރޯލްގެ ޤާނޫނުގެ ދަށުން އެކުލަވާލާ މި ބޯޑުގައި ހިމެނެނީ ބަންޑާރަ ނައިބުގެ އޮފީހާއި، ޕޮލިހާއި، ކަރެކްޝަނަލް ސާވިސްގެ އިތުރުން އެޑިއުކޭޝަން މިނިސްޓްރީ، ހެލްތު މިނިސްޓްރީ، އިސްލާމިކް މިނިސްޓްރީ، ސިއްހީ ދާއިރާ ތަމްސީލުކުރާ މެޑިކަލް ޑޮކްޓަރަކާއި، ނަފްސާނީ ބަލިތަކުގެ ދާއިރާ ތަމްސީލުކުރާ ސައިކޭޓްރިސްޓެއް އަދި ޖަމިއްޔާތައް ތަމްސީލުކުރާ މެންބަރެކެވެ.

މި ބޯޑު ކުރިން ކުއްލި ގޮތަކަށް އުވާލާފައިވަނީ މަސްތުވާތަކެތީގެ ބޮޑު ކުށެއް ސާބިތުވެފައިވާ ފަރާތަކަށް ގާނޫނާ ހިލާފަށް ޕެރޯލް ދީ ޖަލުން މިނިވަންކުރި މައްސަލައެއް ފެންމަތިވުމާ ގުޅިގެންނެވެ. އެއީ އައްޑުއަށް ޑްރަގް އެތެރެކޮށް ވިޔަފާރިކުރާ ކަމަށް ތުހުމަތުކުރެވޭ އަބްދުﷲ އިބްރާހީމް (އަބުޗާ) އަށް ޤާނޫނާ ހިލާފަށް ޕެރޯލްގެ ފުރުސަތުދީ ޖަލުން މިނިވަންކުރުމާ ގުޅިގެންނެވެ. އެ މައްސަލަ ފެންމަތިވުމާއެކު ބޯޑު އުވާލައި، އަބުޗާ ވަނީ އަލުން ޖަލަށް ގެންގޮސްފައެވެ.

އެ މައްސަލައާ ގުޅިގެން ރައީސް އޮފީހުގައި އޭރު ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން ވިދާޅުވީ ޕެރޯލް ބޯޑުން 6 މެންބަރުން ވަކި ކުރަން ނިންމީ އެ ފަރާތްތަކުގެ ކުށެއް އޮވެގެން ނޫން ކަމަށެވެ. ނަމަވެސް މިފަދަ ބޮޑު ނިންމުމެއް ނިންމުމުގައި ބައިވެރިވި މެންބަރުން އެ ބޯޑުގައި ބޭތިއްބުމަށް ރައީސުލްޖުމްހޫރިއްޔާ ބޭނުންފުޅު ނުވާކަމަށް މިނިސްޓަރު ވިދާޅުވިއެވެ.