މޯލްޑިވްސް އިންޑަސްޓްރިއަލް ފިޝަރީފް ކޮމްޕެނީ (މިފްކޯ) އިން މަސްވެރިންނަށް ދެމުން އަންނަ ހިދުމަތްތައް ފަސޭހަކޮށްދިނުމުގެ ގޮތުން "މަސްކިރާ" ގެ ނަމުގައި ހާއްސަ އެޕްލިކޭޝަނެއް ތައާރަފުކޮށްފި އެވެ.
މަސްކިރާ އެޕް އިފުތިތާހުކުރީ މަސްވެރިންގެ ދުވަސް ފާހަގަކުރުމަށް ރޭ ރ. ދުވާފަރުގައި ބޭއްވި ހާއްސަ ޖަލްސާގަ އެވެ.
މަސްކިރާ އެޕްލިކޭޝަނަކީ މިފްކޯގެ ސެންޓަރުތަކާއި ބޯޓު ފަހަރަށް މަސްވެރިން މަސްކިރަން ދާއިރު، އެއްވެސް ފަރާތެއްގެ ބައިވެރިވުމެއް ނެތި އޮޓޯ ޖެނެރޭޓް ކުރެވޭ ކިޔޫ ނަމްބަރެއް ލިބޭ ގޮތަށް ފަރުމާކޮށްފައިވާ އެކްލިކޭޝަނެކެވެ. މަސްކިރުވުމަށް ކިޔޫ ނަމްވަރު ނެގުމުގެ އިތުރަށް ފެނާއި އައިސް ގަތުން ފަދަ ހިދުމަތްތަކަށް ވެސް ދުރާލާ ކިޔޫ ނަމްބަރު ނެގޭނެ އެވެ.
މިފްކޯއިން ބުނީ މި އެޕްގެ ސަބަބުން މަސްކިރުވުމަށް ކިޔޫ ނަމްބަރު ހޯދުމުގައި މީގެ ކުރިން މަސްވެރިން އުފުލަމުން އައި ބުރައަށް ނިމުމެއް އަންނާނެ ކަމަށެވެ. އަދި ދޯނިފަހަރުން ތެލަށް ކުރަމުން އައި ހަރަދުން ވެސް ބޮޑު ބައެއް ސަލާމަތް ކުރެވޭނެ ކަމަށެވެ.
މީގެ އިތުރަށް އެއްވެސް ފަރާތެއްގެ ބައިވެރިވުމެއް ނެތި އޮޓޯ ޖެނެރޭޓްކޮށް ކިޔޫ ނަމްބަރު ނެގޭ ގޮތަށް ހަމަޖެހުމުން ކުންފުނިން މަސްވެރިންނަށް ދޭ ހިދުމަތްތަކުގެ ހާމަކަން ބޮޑުވެ، ދެ ފަރާތުގެ މެދުގައި އޮންނަ އިތުބާރު ބޮޑުވާނެ ކަމަށް މިފްކޯއިން ބުނެ އެވެ.
ކިޔޫ ނަމްބަރު ނެގުމުގެ އިތުރަށް އެހެން ފަސޭހަތަކެއް ވެސް މި އެޕްލިކޭޝަން މެދުވެރިކޮށް މަސްވެރިންނަށް ލިބޭނެ އެވެ. އެގޮތުން މަސްވެރިންނަށް އެމީހުންގެ އޮޑި ރަޖިސްޓަރީ ކުރުމުގެ ފުރުސަތާއި އެ ދޯންޏަކުން މަސް ކިރުވި އަދަދުތަކާއި ދުވަސްތައް ފަދަ ތަފާސްހިސާބު ބަލައިލުމުގެ ފުރުސަތު ލިބޭނެ އެވެ.
ކޮމެންޓް