މިފްކޯއިން ބޮޑުކަންނެލި ގަނެވޭނޭ އިންތިޒާމު ހަމަޖައްސަނީ

މިފްކޯއިން ‏ބޮޑުކަންނެލި ގަނެވޭނޭ އިންތިޒާމު ހަމަޖެއްސޭތޯ މަސައްކަތް ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ، މިރޭ، ރ. ދުވާފަރުގައި ބޭއްވި، ރާއްޖޭގެ 45 ވަނަ މަސްވެރިންގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ރައީސް ވިދާޅުވީ މިފްކޯއިން ބޮޑުކަންނެލި ގަނެވޭނޭ އިންތިޒާމު ދެމެހެއްޓެނިވި ގޮތެއްގައި ހަމަޖެއްސެވުމަށް ޓަކައި އިތުރު މަސައްކަތްތައް ކުރައްވަމުންގެންދަވާ ކަމަށެވެ. އަދި ހުޅުމާލޭގައި ގާއިމުކުރާ ފެސިލިޓީގެ މަސައްކަތްތައް ގޮސްފައިވާ ހިސާބަށް ބައްލައި އިރު، ދާދި އަވަހަށް މިފްކޯއިން ބޮޑުކަންނެލި ގަންނަން ފެށޭނޭ ކަމަށް އެ މަނިކުފާނު އަންދާޒާ ކުރެއްވި އެވެ.

އެ މަނިކުފާނު އެންމެ ބޮޑަށް ދެކެވަޑައިގަންނަވަން ބޭނުންފުޅު ވަނީ، މަސްވެރިކަމުގެ ސިނާއަތަކީ ހަމައެކަނި ދިވެހީން މަސައްކަތްކުރާ ސިނާއަތަކަށް ވާނޭ ދުވަސް ކަމަށް ރައީސް ވިދާޅުވި އެވެ.

އެ ގޮތުން ދިވެހި ޒުވާނުން އެ ދާއިރާއަށް ނެރޭ ފަރާތްތަކާއި، އޮޑިފަހަރުގައި ހަމައެކަނި ދިވެހި ފަޅުވެރިން ގެންގުޅޭ ފަރާތްތަކަށް ހިތްވަރުދިނުމުގެ ގޮތުން، ގައުމީ ފެންވަރެއްގައި އެ ފަރާތްތަކުގެ އަގު ވަޒަން ކުރައްވާނޭ ކަމަށް އެ މަނިކުފާނު ވިދާޅުވި އެވެ.

މަސްވެރިކަމުގެ ސިނާއަތް ނަގާ ކޮޅަށްޖެހުމަށް ވޭތުވެ ދިޔަ ދެ އަހަރު ކުރެވިފައިވާ މަސައްކަތްތަކަކީ މިއަދު ތަފާސްހިސާބު ތަކުން ފެންނާންހުރި ހަގީގަތް ކަމަށް އެ މަނިކުފާނު ވިދާޅުވި އެވެ. އަދި މި ސިނާއަތް ކުރިއެރުވުމަކީ ފަރުދީ އަދި ޖަމައީ ތަރައްގީއަށް ކުރެވޭ ގައުމީ މަސައްކަތެއްގެ ގޮތުގައި ސިފަ ކުރައްވައި، ގައުމީ ވިސްނުމާ ދެކޮޅު ސިޔާސީ އޮއިވަރުގައި ނުޖެހި، އެންމެން އެކުގައި މަސައްކަތް ކުރުމަށް އެ މަނިކުފާނު އިލްތިމާސް ކުރެއްވި އެވެ.