ރައީސް ޑރ. މުހައްމަދު މުއިއްޒު މާލޭގެ ހުރިހާ އަވަށްތަކުގެ ރައްޔިތުންނާ ބައްދަލުކުރެއްވުމަށް ފައްޓަވާފައިވާ ސިލްސިލާ ބައްދަލުވުންތަކުގެ ތެރެއިން އަންނަ އަންގާރަ ދުވަހުގެ ރޭ ގަލޮޅު ރައްޔިތުންނާ ބައްދަލުކުރައްވަން ނިންމަވައިފި އެވެ.
ރައީސް އޮފީހުގެ ތަރުޖަމާން ހީނާ ވަލީދު ކުރެއްވި އެކްސް ޕޯސްޓެއްގައި ވިދާޅުވީ ރައީސް ގަލޮޅު ރައްޔިތުންނާ ބައްދަލު ކުރައްވާނީ އިމާދުއްދީން އިސްކޫލުގައި އަންނަ އަންގާރަ ދުވަހުގެ ރޭ 8:30ގައި ކަމަށެވެ.
ހީނާ ވިދާޅުވި ގޮތުގައި ރައީސް ބާއްވަވާ ބައްދަލުވުންތަކުގެ ބޭނުމަކީ އެކި ކަންކަމުގައި ރައްޔިތުންގެ ހިޔާލާއި މަޝްވަރާ ހޯއްދެވުމެވެ.
އަންގާރަ ދުވަހުގެ ރޭގެ ބައްދަލުވުމުގައި ބައިވެރިވުމަށް ގަލޮޅުގައި ދިރިއުޅޭ ހުރިހާ ރައްޔިތުންނަށް ސަރުކާރުން ދައުވަތު ދީފައިވެ އެވެ.
ރައީސް ގެންދަވަނީ މިދިޔަ ނޮވެމްބަރު މަހުގެ 23 ވަނަ ދުވަހުން ފެށިގެން މާލޭގެ އަވަށްތަކުގެ ރައްޔިތުންނާ ބައްދަލުކުރައްވަމުންނެވެ. އެގޮތުން މިހާތަނަށް ވަނީ ވިލިމާލެ، މައްޗަންގޮޅި، މާފަންނު އަދި ހެންވޭރުގެ ރައްޔިތުންނާ ބައްދަލު ކުރައްވާފަ އެވެ.
ވެރިކަމާ ހަވާލުވެޑައިގަތް ފަހުން މިދިޔަ ދެ އަހަރެއްހާ ދުވަހުގެ ތެރޭ ރައީސް ޑރ. މުއިއްޒު ވަނީ ރާއްޖޭގައި މީހުން ދިރިއުޅޭ 187 ރަށަށް ވެސް ވަޑައިގެންފަ އެވެ.
ކޮމެންޓް