ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އައު ޓާމިނަލުން މިހާތަނަށް 2,000 އަށްވުރެ ގިނަ ފަސިންޖަރުންނަށް ހިދުމަތް ދީފި އެވެ.
ރައީސް ޑރ. މުޙައްމަދު މުއިއްޒު، ވީއައިއޭގެ އައު ޓާމިނަލް ރަސްމީކޮށް ހުޅުއްވައިދެއްވީ މިމަހުގެ 26 ވަނަ ދުވަހުގެ ރޭ އެވެ.
އެއާއެކު ޓާމިނަލްގެ އޮޕަރޭޝަންތައް ފަށާފައިވަނީ މި މަހުގެ 27 ވަނަ ދުވަހު އިންޑިއާގެ ކޮޗިން އިންޓަނޭޝަނަލް އެއާޕޯޓުން މާލެ އައި ގައުމީ އެއާލައިން މޯލްޑިވިއަންގެ މަތިންދާބޯޓަކާ އެކު އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ބުނީ އެ ދުވަހުން ފަށައިގެން އިއްޔެގެ ނިޔަލަށް ޓާމިނަލް އެކަކުން މޯލްޑިވިއަންގެ ބޯޓުތަކަށް 14 ފަހަރު ހިދުމަތް ދީފައިވެ އެވެ.
އެއީ ޖުމުލަ 2,410 ފަސިންޖަރުންނެވެ.
އޭގެ ތެރޭގައި ހިމެނެނީ ރާއްޖެއިން ފުރި 956 ފަސިންޖަރަކާއި ރާއްޖެ އައި 1,454 ފަސިންޖަރެކެވެ.
ވީއައިއޭ ހިންގައި އެމްއޭސީއެލުން ބުނީ ޓާމިނަލް އެކަކަށް ބައިނަލްއަގުވާމީ ދަތުރުތައް ބަދަލު ކުރުމަށް ހަމަޖެހިފައި ވަނީ އޮރާޓް ޕްރޮސެސްގެ ތެރެއިން ކަމަށާއި އެކަން ކުރާނީ ބައިނަލްއަގުވާމީ ކޮންސަލްޓަންޓް ފާމެއް ކަމަށްވާ މޮޑާލިސްއާ ގުޅިގެން ކަމަށެވެ.
އެ ޕްރޮސެސްގެ ތެރެއިން ފަހަރަކު އެއާލައިނަކަށްފަހު އެއާލައިނެއް ބަދަލުކުރަމުން ގޮސް، މި އަހަރުގެ ފަތުރުވެރިކަމުގެ މޫސުން ފެށުމުގެ ކުރިން ހުރިހާ އެއާލައިނެއްގެ ހިދުމަތް އައު ފަސިންޖަރު ޓާމިނަލަށް ބަދަލުކުރާނެ ކަމަށް ވެސް އެމްއޭސީއެލުން ބުނެފައިވެ އެވެ.
ކޮމެންޓް