އެންވަރްމަންޓް އެންޑް އެޖާނީ މިނިސްޓަރު އަލީ ޝަރީފް އޭޝިއަން ޑިވެލޮޕްމަންޓް ބޭންކް، އޭޑީބީގެ ވައިސް ޕްރެޒިޑެންޓް ސެކްޓާސް އެންޑް ތީމްސް ވެމްޕީ ސަޕުތުރާއާ ބައްދަލުކުރައްވައިފި އެވެ.
ތައިލެންޑުގެ ބެންކޮކްގައި މިހާރު ކުރިއަށްދާ އައިއެމްއެފް އަދި ވޯލްޑް ބޭންކުގެ އަހަރީ ބައްދަލުވުގެ ހަވާސާގައި، މިނިސްޓަރު އަލީ ޝަރީފް، މިއަދު ވަނީ އޭޑީބީގެ ވައިސް ޕްރެޒިޑެންޓުގެ އަރިހަށް އިހުތިރާމުގެ ޒިޔާރަތެއް ކުރައްވާފަ އެވެ.
މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ ރާއްޖޭގެ އިގުތިސާދީ ކުރިއެރުމަށާއި ދެމެހެއްޓެނިވި ތަރައްގީއަށްޓަކައި ސްޓްރެޓީޖިކް ގުޅުންތައް ބަދަހިކުރުމާ ގުޅޭގޮތުންނެވެ.
އެގޮތުން، އައްޑޫ އަދި ތިލަފުށީގައި ގާއިމުކުރާ ކުނިން ހަކަތަ އުފައްދާ (ވޭސްޓް-ޓު-އެނާޖީ) ޕްލާންޓްތަކުގެ މަސައްކަތް ނިންމައި އެ މަޝްރޫއުތައް ފުޅާކުރުމާއި، ތިލަފުށީގެ ހަކަތައިގެ ނެޓްވޯކް މާލޭގެ ގްރިޑާ ގުޅާލުމާ ގުޅޭގޮތުން ވަނީ ފުޅާ ދާއިރާއެއްގައި ވާހަކަދައްކަވާފަ އެވެ. އަދި މީގެ އިތުރުން ގްރިޑް އިންޓަކަނެކްޝަންތައް އިތުރަށް ހަރުދަނާކުރުމަށާއި، މި ދާއިރާއިން ފަންނީ ގާބިލުކަން އިތުރުކުރުމަށް އިސްކަންދިނުމާ ގުޅޭގޮތުން ވެސް މަޝްވަރާކުރެވުނެވެ.
މީގެއިތުރުން، ފަތުރުވެރިކަމުގެ ދާއިރާ ހިމެނޭހެން އިރުގެ އަލިން ހަކަތަ އުފެއްދުމުގެ (ސޯލާ) މަޝްރޫއުތަކަށް އިންވެސްޓްމަންޓް އަވަސްކުރުމަށް ޓަކައި، އަމިއްލަ ވިޔަފާރިތަކުގެ ރައުސްމާލު ހޯދުމުގެ މުހިންމުކަން މިނިސްޓަރު އަލީ ޝަރީފް ވަނީ ފާހަގަކުރައްވާފަ އެވެ.
މިނިސްޓްރީން ބުނީ މި ބައްދަލުވުމަކީ ރާއްޖޭގެ ތިމާވެށްޓާއި ހަކަތައިގެ ދާއިރާއަށް ބޭނުންވާ މާލީ އަދި ފަންނީ އެހީތެރިކަން ހޯދުމަށް އެޅުނު މުހިންމު ފިޔަވަޅެއް ކަމަށެވެ.
ކޮމެންޓް