ލިޔުންތެރިންގެ ހުރި ދަތިތައް ހައްލުކޮށްދޭނެ ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެ އެވެ.
މިނިސްޓަރު ހީނާ އިއްޔެ ވަނީ ދިވެހި ލިޔުންތެރިންނާ ބައްދަލުކުރައްވާފަ އެވެ.
އެ މިނިސްޓްރީގައި ބޭއްވި ބައްދަލުވުމުގެ މައިގަނޑު މަގުސަދަކީ، ލިޔުންތެރިކަމަކީ އެ މިނިސްޓްރީއާ ގުޅުންހުރި ވަރަށް މުހިންމު ދާއިރާއެއްކަމަށްވާތީ، ލިޔުންތެރިކަމުގެ ދާއިރާ މިހާރު އޮތް ހާލަތާއި، ލިޔުންތެރިންނަށް ދިމާވާ މައްސަލަތަކާއި، އެ ކަންކަން ހައްލުކުރުމަށް ޓަކައި ބޭނުންވާ ކަންތައްތަކާ ބެހޭގޮތުން މަޝްވަރާކުރެއްވުމެވެ.
އެ ބައްދަލުވުމެއްގައި ހީނާ ވިދާޅުވީ، ލިޔުންތެރިންގެ ހުރި ކަންބޮޑުވުންތަކާއި ދަތިތަކާއި ހިޔާލުތައް އަޑުއައްސަވައި، އެ ދަތިތަކަށް ހައްލު ހޯއްދަދީ، މި ދާއިރާގެ މިހާރުގެ ހާލަތު އިތުރަށް ރަނގަޅުކުރުމަށް މަސައްކަތްތަކެއް ކުރައްވާނެ ކަމަށެވެ.
މި ބައްދަލުކުރެއްވުމުގައި ދިވެހިބަހުގެ އެކެޑެމީގެ ރައީސް ހަސަން ޝާކިރު މުހައްމަދާއި، ބައެއް ލިޔުންތެރިން ވަނީ ލިޔުންތެރިކަމުގައި މިހާރު ހުރި ގޮންޖެހުންތަކާއި، ޒުވާން ޖީލު ލިޔުންތެރިކަމަށް ޝައުގުވެރިކުރެވޭނެ ބައެއް ކަންކަމާ ގުޅޭގޮތުން ހިޔާލު ބަދަލުކުރައްވާފަ އެވެ.
މި ބައްދަލުކުރެއްވުމުގައި ލިޔުންތެރިންގެ ހިޔާލަށް ހުޅުވާލުން، ބައެއް ލިޔުންތެރިން ވަނީ އެ ފަރާތްތަކުގެ ކަންބޮޑުވުންތަކާއި، މިހާރަށްވުރެ އިތުރަށް ލިޔުންތެރިކަން ރަނގަޅުކުރުމަށް ކުރެވިދާނެ ކަންކަމާ ގުޅޭގޮތުން ވާހަކަ ދައްކާފަ އެވެ.
ކޮމެންޓް