ފެނަކަ ކޯޕަރޭޝަން ލިމިޓެޑް ހިންގުމަށް ވަގުތީ ގޮތުން ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒުވަރާ ހަވާލުކޮށްފި އެވެ.
ޕްރައިވެޓައިޒޭޝަން އެންޑް ކޯޕްރަޓައިޒޭޝަން ބޯޑު، ޕީސީބީން ބުނީ ފެނަކަ ކޯޕަރޭޝަން ލިމިޓެޑްގެ އެގްޒެކެޓިވް ޑިރެކްޓަރު އަދި އެކްޓިން މެނޭޖިން ޑިރެކްޓަރުގެ މަގާމަށް، ސ. ފޭދު، ނެސްޕްރޯވިލާ، ޑރ. އަލީ އަޒުވަރު މިއަދުން ފެށިގެން އައްޔަންކޮށްފައިވާ ކަމަށެވެ. މީގެ އިތުރުން ޑިރެކްޓަރުންގެ ބޯޑަށް، ހ. ހުދުރިޔާ، އިބްރާހިމް ނިޒާމް އައްޔަނުކޮށްފައި ކަމަށް ޕީސީބީން ބުންޏެވެ.
ފެނަކައިގެ މެނޭޖިން ޑިރެކްޓަރުގެ މަގާމުންނާއި، ޑިރެކްޓަރުންގެ ބޯޑުން، މުހައްމަދު އަފީފް ވަކިކުރީ މިއަދުގެ ވަގުތެއްގަ އެވެ.
ފެނަކަ އުވާލާ ހުރިހާ މަސައްކަތެއް ސްޓެލްކޯއަށް ބަދަލުކުރުމުގެ މަސައްކަތް ސަރުކާރުން އަންނަނީ ކުރަމުންނެވެ.
ސަރުކާރުގެ ހިއްސާވާ ދެ ކުންފުނި ކަމުގައިވާ ފެނަކަ ކޯޕަރޭޝަނާއި ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އުވާލުމަށް ނިންމަވާފައިކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ މިދިޔަ މަހުގެ ހަތް ވަނަ ދުވަހު ބޭއްވި ނޫސްވެރިން ބައްދަލުވުމުގަ އެވެ.
ކޮމެންޓް