ވެލާނާ އިންޓަނޭޝަނަލް އެއާޕޯޓު (ވީއައިއޭ) މެދުވެރިކޮށް މި މަހު ފުރި އުމްރާވެރިންނަށް މަޑުޖެހުމެއް ނެތި، ލުއިފަސޭހަ، އަވަސް ހިދުމަތްތަކެއް ފޯރުކޮށްދިނުމަށް، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހިންގި ހާއްސަ އޮޕަރޭޝަން، މިއަދު ފަހު އުމްރާ ގްރޫޕް ފުރުމާއެކު ނިންމާލައިފި އެވެ.
މި މަހު ރާއްޖެއިން 5,565 އަށްވުރެ ގިނަ އުމްރާވެރިން ފުރުމާއެކު، އޮޕަރޭޝަން ނިމި، ފުރާ ހުރިހާ ޢުމްރާވެރިން ވެސް ވަނީ ރާއްޖެއިން ފުރާފަ އެވެ. މި އޮޕަރޭޝަން ހިންގުމަށް ކުންފުނީގެ ޕެސެންޖާ ސާވިސަސް، ޓާމިނަލް ސާވިސަސް އަދި އެސްޓޭޓް ސެކިޔުރިޓީ ސާވިސަސް ގުޅިގެން ގިނަ ހާއްސަ އިންތިޒާމުތަކެއް ހަމަޖެއްސި އެވެ.
އޮޕަރޭޝަންގެ ދަށުން އެޅުނު މުހިންމު ފިޔަވަޅެއްގެ ގޮތުގައި، 100 އަށްވުރެ ގިނަ މީހުން ހިމެނޭ ގްރޫޕްތަކަށް ފުރުމުގެ އެއް ދުވަސް ކުރިން ޕްރީ-ޗެކިން ހެދުމުގެ ފުރުސަތު ހުޅުވާލެވުނެވެ.
މިއާއެކު ޢުމްރާވެރިންގެ ފޮށިތައް ކުރިއާލާ ޗެކިންކޮށް، ބޯޑިން ޕާސް ދޫކުރުމުގެ މަސައްކަތް ޓާމިނަލް ސަޕޯޓް ސާވިސަސްގެ އެހީތެރިކަމާއެކު އޮމާންކޮށް ކުރިއަށް ގެންދެވުނެވެ. އަދި މޯލްޑިވްސް އިމިގްރޭޝަނާ ގުޅިގެން ޕާސްޕޯޓްތަކުގެ އެޑްވާންސް ކްލިއަރެންސް ހެދުމުގެ އިންތިޒާމު ވެސް ހަމަޖެއްސުނެވެ.
އުމްރާވެރިން އެއާޕޯޓަށް އައި ވަގުތު، އެ ފަރާތްތަކަށް ހާއްސަ ކުރެވިފައިވާ ދޮރަކުން ޓާމިނަލަށް ވަންނަން ފަސޭހަކޮށްދީ، އިމިގްރޭޝަން އަދި ސެކިޔުރިޓީ ސްކްރީނިން މަރުހަލާތައް އަވަސްކުރުމަށް ވަކި ކައުންޓަރުތަކާއި އެކްސް-ރޭ މެޝިންތައް ހާއްސަކުރެވުނެވެ.
މީގެ އިތުރުން، އެއާޕޯޓުގެ ބޭރުގެ ސަރަހައްދު ތަރުތީބުކޮށް، ޓެކްސީ ކިއުތައް ބެލެހެއްޓުމާއި، އުޅަނދުފަހަރަށް ފަސޭހައިން ވަދެ ނިކުމެވޭނެ މަގުތައް ކުންފުނީގެ އެސްޓޭޓް ސެކިޔުރިޓީ ސާވިސަސްއިން ބެލެހެއްޓި އެވެ.
މި ހާއްސަ އޮޕަރޭޝަންގެ ސަބަބުން، އުމްރާވެރިންނަށް ޗެކިން، އިމިގްރޭޝަން، ސެކިޔުރިޓީ ސްކްރީނިން އަދި ބޯޑިން އޮމާންކޮށް އަދި އަވަހަށް ނިންމާލެވި، އެއްވެސް ބޮޑު ބުރޫއެރުމެއްނެތި ފުރުމުގެ ހިދުމަތް ފޯރުކޮށްދެވުނެވެ.
އެމްއޭސީއެލްގެ މައިގަނޑު މަގުސަދަކީ، މިފަދަ ބާރުބޮޑު ދުވަސްވަރުގައި ވެސް އުމްރާވެރިންނަށާއި އެހެނިހެން ފަސިންޖަރުންނަށް ދޭ ހިދުމަތްތައް އެއްވެސް ބުރޫއެރުމެއްނެތި، ފުރިހަމަ އަދި އޮމާން ގޮތެއްގައި ފޯރުކޮށްދިނުމެވެ.
މި އޮޕަރޭޝަން ކާމިޔާބުކަމާއެކު ނިންމުމަށް އެހީތެރިވެދިން މޯލްޑިވްސް އިމިގްރޭޝަނާއި، އެއާލައިންތަކާއި، ޓްރެވެލް އެޖެންސީތަކާއި، އުމްރާ ގްރޫޕްތަކާއި، ކަމާ ގުޅުންހުރި ހުރިހާ މުއައްސަސާތަކާއި ފަރާތްތަކުން ދިން އެއްބާރުލުމަށް އެމްއޭސީއެލުން ވަނީ ޝުކުރު އަދާކޮށްފަ އެވެ.
ކޮމެންޓް