ރިދަން އެކަޑެމީ ޗެމްޕިއަންޝިޕް 2026 14 އަހަރުން ދަށުގެ އުމުރުފުރާގެ ފައިނަލަށް ފްރެންޑްސް ފުޓްބޯލް ފެމިލީ އެކަޑެމީގެ އިތުރުން ރިދަން ސްޕޯޓްސް އެކަޑެމީ ދަތުރުކޮށްފިއެވެ.
އެ ދެ ޓީމު މުބާރާތުގެ ފައިނަލުން ޖާގަ ހޯދީ އއ. ތޮއްޑޫ ފުޓުބޯޅަ ދަނޑުގައި މިއަދު ކުޅުނު އެ މުބާރާތުގެ 14 އަހަރުން ދަށުގެ ސެމީ ފައިނަލްގެ މެޗުތަކުން މޮޅުވެގެންނެވެ.
އެގޮތުން ސެމީގެ ފުރަތަމަ މެޗުގައި ރިދަން ބައްދަލުކުރީ ރަސްދޫ ފުޓުބޯޅަ އެކަޑެމީއާއެވެ. އެ މެޗުގެ ފުރިހަމަ ވަގުތު ނިމުނީ 1-1 ގެ ނަތީޖާއަކުން އެއްވަރުވެގެންނެވެ. އެހެންކަމުން ނަތީޖާނެރުމަށް ޕެނަލްޓީ ޖަހައި ރިދަން މެޗު ކާމިޔާބުކުރީ 3-2 ގެ ނަތީޖާއަކުންނެވެ.
ސެމީގެ ދެވަނަ މެޗުގައި ބައްދަލުކުރީ ސަޑޭ ސްޕޯޓްސް އެކަޑެމީއާއި ފްރެންޑްސް ފުޓްބޯލް ފެމިލީ އެކަޑެމީއެވެ. އެ މެޗު ފަސޭހަކަމާއެކު ފްރެންޑްސް ފުޓްބޯލް ފެމިލީ އެކަޑެމީން ވަނީ ކާމިޔާބުކޮށްފައެވެ. އެ މެޗު އެ ޓީމުން ކާމިޔާބުކުރީ 7-1 ގެ ފަރަގުބޮޑު ނަތީޖާއަކުންނެވެ.
ފްރެންޑްސް ފުޓްބޯލް ފެމިލީ އެކަޑެމީއާއި ރިދަން ސްޕޯޓްސް އެކަޑެމީ ބައްދަލުކުރާ ފައިނަލް މެޗު ކުޅެން ހަމަޖެހިފައިވަނީ މާދަމާ ހެނދުނު 6:00ގައެވެ.
ދެ އުމުރުފުރާއަކަށް ބަހާލައިގެން ކުރިއަށް ގެންދާ އެ މުބާރާތުގައި ރާއްޖޭގެ މަޝްހޫރު އެކަޑެމީތަކުން ވެސް ބައިވެރިވެއެވެ. އެގޮތުން މާލެއިން ބައިވެރިވެފައިވާ ޓީމުތަކުގެ ތެރޭގައި ޔުނައިޓެޑް ވިކްޓްރީ އެކަޑެމީއާއި ފްރެންޑްސް ފުޓްބޯލް ފެމިލީ އެކަޑެމީ ހިމެނެއެވެ. އއ. އުކުޅަހުން އެ މުބާރާތުގައި އުކުޅަސް ސްޕޯޓްސް އެކަޑެމީ ބައިވެރިވާއިރު އެ އަތޮޅު ރަސްދޫއިން އެ މުބާރާތުގައި ބައިވެރިވަނީ ރަސްދޫ ފުޓްބޯލް އެކަޑެމީއެވެ.
މީގެ އިތުރުން އައްޑޫ ސިޓީގެ ސަޑޭ ސްޕޯޓްސް އެކަޑެމީން ވެސް އެ މުބާރާތުގައި ބައިވެރިވެފައިވެއެވެ. ޅ. ނައިފަރުގެ މަޝްހޫރު އެޕެކްސް ސްޕޯޓްސް އެކަޑެމީން ބައިވެރިވާއިރު ކ. މާފުށީގެ ނިއު ސްޓާ އެކަޑެމީން ވެސް ވަނީ އެ މުބާރާތުގައި ބައިވެރިވެފައެވެ.
ލަންކާއިން އެ މުބާރާތުގައި ވާދަކުރާނީ ޖެޓްލައިނާސް އެކަޑެމީއެވެ. އަދި ތޮއްޑޫއިން އެ މުބާރާތުގައި ކުޅެނީ ރިދަން ސްޕޯޓްސް އެކަޑެމީއެވެ.
މިމަހުގެ 18 ވަނަ ދުވަހު ފެށި އެ މުބާރާތުގެ ގްރޫޕް ސްޓޭޖުގެ ގިނަ މެޗުތަކެއް މިހާރު ވަނީ ނިމިފައެވެ.
މިއަހަރުގެ މުބާރާތް ވެސް އެހެން އަހަރުތަކެކޭ އެއްގޮތަށް ހަތަރު އުމުރުފުރާއަށް ކުރިއަށް ގެންދިއުމަށް ވަނީ ހަަމަޖެހިފައެވެ. ނަމަވެސް މިއަހަރުގެ މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެބަޔަކަށް ބަހާލައިގެންނެވެ.
އެ މުބާރާތުގެ ދެވަނަ ބައި ފަށަން ހަމަޖެހިފައިވަނީ ސެޕްޓެމްބަރު މަހުގެ 12 އިން 17 ވަނަ ދުވަހުގެ ނިޔަލަށެވެ. އެ މުބާރާތުގައި ވާދަކުރާނީ 10 އަހަރުން ދަށުގެ އުމުރުފުރާގެ އިތުރުން 12 އަހަރުން ދަށުގެ އުމުރުފުރާގެ ޓީމުތަކެވެ.
ކޮމެންޓް