ސިނަމާލެ ބުރިޖު މަތިން ކަނޑަށް ފުންމާލި ބިދޭސީއަކު ސަލާމަތްކޮށްފި އެވެ.
އެމްއެންޑީއެފުން ބުނީ މި ހާދިސާގެ މައުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރަށް، ލިބުނީ ރޭ ދަންވަރު 12:44 ހާއިރު ކަމަށެވެ.
މައުލޫމާތު ލިބުމާ ގުޅިގެން އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން ވަނީ އެ ސަރަހައްދަށް ގޮސް އެ މީހާ ހޯދުމުގެ މަސައްކަތްކޮށްފަ އެވެ.
އެގޮތުން މީހާ ހޯދުމުގެ މަސައްކަތްކުރަމުންދަނިކޮށް، ޑައިވަރުންނަށް އޭނާ ފެނިފައިވަނީ ބުރިޖުގެ ތަނބެއްގައި ހިފަހައްޓައިގެން އޮއްވާ ކަމަށް އެމްއެންޑީއެފުން ބުންޏެވެ.
އަދި އެމްއެންޑީއެފް ކޯސްޓްގާޑް ހާބާ ކްރާފްޓަށް އެ މީހާ ނެގުމަށްފަހު ފުލުހުންނާ ވަނީ ހަވާލުކޮށްފަ އެވެ.
ބުރިޖު މަތިން ކަނޑަށް ފުންމާލުމަކީ ދޭތެރެދޭތެރެއިން ހިނގާ ކަމެކެވެ. މީގެ ތެރޭގައި ދިވެހީން ވެސް ހިމެނެ އެވެ.
ކޮމެންޓް