ރާއްޖެއާއި ސައުދީގެ ގުޅުމުގެ އުންމީދީ އައު ބާބެއް ފެށެމުން އެބަދޭ: ރައީސް

ރާއްޖެއާއި ސައުދީ އަރަބިއްޔާގެ ގުޅުމުގެ އުންމީދީ އައު ބާބެއް ފެށެމުން އެބަދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ، ސައުދީގެ 96 ވަނަ ގައުމީ ދުވަސް ފާހަގަކުރުމުގެ ގޮތުން ނީވާ ކުރުނބާ މޯލްޑިވްސްގައި ރޭ ބޭއވި ހަފުލާގައި ވާހަކަފުޅުދައްކަވަމުންނެވެ.

ރާއްޖެއާއި ސައުގެ ގުޅުމުގެ އުންމީދީ އައު ބާބެއް ފެށެމުންދާކަމަށާއި، ދެ ގައުމުގެ މެދުގައި އިގުތިސާދީ ގުޅުމާއި، ވުނަކުރުމާއި އަދި ތަރައްގީގެ ބައިވެރިވުން ފުޅާކުރުމަށް ފުރުސަތުތަކެއް ފަހިވަމުންއެބަދާކަމުގައި ރައީސް ވިދާޅުވި އެވެ.

ރައީސްގެ ވާހަފުޅުގައި ދެ ގައުމުގެ ގުޅުމުގެ އަސާސަކީ އެއް އަގީދާއަކާއި، އެއްގޮތް އުސޫލުތަކެއްގެ އިތުރުން، އެއްބަޔަކު އަނެއްބަޔަކަށް ކުރާ އިހުތިރާމާއި އިސްލާމީ ވަރުގަދަ އުޚުއްވަތްތެރިކަން ކަމުގައި ވިދާޅުވި އެވެ.

ރާއްޖޭގެ ތަރައްގީގައި ސައުދީން ވަމުން އަންނަ ދީލަތި އެހީތެރިކަމަށާއި، ހާއްސަގޮތެއްގައި 2004 ގެ ސުނާމީއާ ގުޅިގެން ދިން އެހީތެރިކަމާ އެކު މެދުނުކެނޑި ދެމުން އަންނަ އެއްބާރުލެއްވުމަށް އެމަނިކުފާނު ވަނީ ޝުކުރު އަދާކުރައްވާފަ އެވެ.

ރައީސް ވަނީ ރާއްޖޭގައި ވުނަކުރުމުގެ މާހައުލު އިތުރަށް ފަހިކޮށްދެއްވައި، ރާއްޖޭގެ އިގުތިސާދަށް ގެންނަ ހެޔޮ ބަދަލުތަކުގައި ސައުދީގެ ވިޔަފާރިވެރިންނާއި ވުނޭރުންނަށް ފުޅާ ދާއިރާއެއްގައި ބައިވެރިވެވޭނެ މަގު ތަނަވަސްކޮށްދެއްވާނެކަމުގެ ޔަގީންކަން ދެއްވާފަ އެވެ.

ބައިނަލްއަގުވާމީ މައިދާނުގައި ވެސް ސައުދީއާ އެކު ގާތުން މަސައްކަތްކުރެއްވުމަށް ރާއްޖެއިން ތައްޔާރަށް އޮތްކަން ރައީސް ވަނީ ތަކުރާރުކުރައްވާފަ އެވެ. މީގެ އިތުރުން، ސުއްހައާއި، ހަމަޖެހުމާއި، ތަނަވަސްކަން ގާއިމުކުރުމުގެ އިތުރުން، އިސްލާމީ އުންމަތަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ދެ ގައުމު ގުޅިގެން މެދުނުކެނޑި މަސައްކަތްކުރަމުން ގެންދާނެކަމުގެ ޔަގީންކަން އެމަނިކުފާނު ދެއްވި އެވެ.

ދެ ގައުމުގެ މެދުގައި އޮތް ޒަމާންވީ ރަހުމަތްތެރިކަމާއި ބަދަހި ގުޅުމާ އެކު، ރާއްޖެއާއި ސައުދީ ގުޅިގެން އަދަށްވުރެ ފާގަތި މުސްތަގުބަލެއް ބިނާކުރެވޭނެކަމުގެ ޔަގީންކަން އެމަނިކުފާނު ފާޅުކުރެއްވި އެވެ.