ރިދަން އެކަޑެމީ ޗެމްޕިއަންޝިޕް 2026 ގެ 17 އަހަރުން ދަށުގެ ޗެމްޕިއަންކަން ވެސް ފްރެންޑްސް ފުޓްބޯލް ފެމިލީ އެކަޑެމީން ހޯދައިފިއެވެ.
އެ މުބާރާތުގެ 14 އަހަރުން ދަށުގެ ޗެމްޕިއަންކަން ވެސް ހޯދައިފައިވަނީ ފްރެންޑްސް ފުޓްބޯލް ފެމިލީ އެކަޑެމީންނެވެ.
މިއަދު ހަވީރު އއ. ތޮއްޑޫ ފުޓުބޯޅަ ދަނޑުގައި ކުޅުނު 17 އަހަރުން ދަށުގެ ފައިނަލް މެޗުގައި ބައްދަލުކޮށްފައިވަނީ ފްރެންޑްސް ފުޓްބޯލް ފެމިލީ އެކަޑެމީއާއި އުކުޅަސް ސްޕޯޓްސް އެކަޑެމީއެވެ.
އެ މެޗު ފްރެންޑްސް ފުޓްބޯލް ފެމިލީ އެކަޑެމީން ކާމިޔާބުކޮށްފައިވަނީ 1-0 ގެ ހަނި ނަތީޖާއަކުންނެވެ.
ދެ ޓީމުގެ މެދުގައި ވާދަވަރިކަން ފެނުނު އެ މެޗުގައި ޖެހި ހަމައެކަނި ގޯލު ޖަހައިފައިވަނީ މެޗުގެ 9 ވަނަ މިނެޓުގައި ޒާކީ މުޖުތަބާ ޒާހިރުއެވެ.
ދެ އުމުރުފުރާއަކަށް ބަހާލައިގެން ކުރިއަށް ގެންދާ އެ މުބާރާތުގައި ރާއްޖޭގެ މަޝްހޫރު އެކަޑެމީތަކުން ވެސް ބައިވެރިވެއެވެ. އެގޮތުން މާލެއިން ބައިވެރިވެފައިވާ ޓީމުތަކުގެ ތެރޭގައި ޔުނައިޓެޑް ވިކްޓްރީ އެކަޑެމީއާއި ފްރެންޑްސް ފުޓްބޯލް ފެމިލީ އެކަޑެމީ ހިމެނެއެވެ. އއ. އުކުޅަހުން އެ މުބާރާތުގައި އުކުޅަސް ސްޕޯޓްސް އެކަޑެމީ ބައިވެރިވާއިރު އެ އަތޮޅު ރަސްދޫއިން އެ މުބާރާތުގައި ބައިވެރިވަނީ ރަސްދޫ ފުޓްބޯލް އެކަޑެމީއެވެ.
މީގެ އިތުރުން އައްޑޫ ސިޓީގެ ސަޑޭ ސްޕޯޓްސް އެކަޑެމީން ވެސް އެ މުބާރާތުގައި ބައިވެރިވެފައިވެއެވެ. ޅ. ނައިފަރުގެ މަޝްހޫރު އެޕެކްސް ސްޕޯޓްސް އެކަޑެމީން ބައިވެރިވާއިރު ކ. މާފުށީގެ ނިއު ސްޓާ އެކަޑެމީން ވެސް ވަނީ އެ މުބާރާތުގައި ބައިވެރިވެފައެވެ.
ލަންކާއިން އެ މުބާރާތުގައި ވާދަކުރާނީ ޖެޓްލައިނާސް އެކަޑެމީއެވެ. އަދި ތޮއްޑޫއިން އެ މުބާރާތުގައި ކުޅެނީ ރިދަން ސްޕޯޓްސް އެކަޑެމީއެވެ.
މިމަހުގެ 18 ވަނަ ދުވަހު ފެށި އެ މުބާރާތުގެ ގްރޫޕް ސްޓޭޖުގެ ގިނަ މެޗުތަކެއް މިހާރު ވަނީ ނިމިފައެވެ.
މިއަހަރުގެ މުބާރާތް ވެސް އެހެން އަހަރުތަކެކޭ އެއްގޮތަށް ހަތަރު އުމުރުފުރާއަށް ކުރިއަށް ގެންދިއުމަށް ވަނީ ހަަމަޖެހިފައެވެ. ނަމަވެސް މިއަހަރުގެ މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެބަޔަކަށް ބަހާލައިގެންނެވެ.
އެ މުބާރާތުގެ ދެވަނަ ބައި ފަށަން ހަމަޖެހިފައިވަނީ ސެޕްޓެމްބަރު މަހުގެ 12 އިން 17 ވަނަ ދުވަހުގެ ނިޔަލަށެވެ. އެ މުބާރާތުގައި ވާދަކުރާނީ 10 އަހަރުން ދަށުގެ އުމުރުފުރާގެ އިތުރުން 12 އަހަރުން ދަށުގެ އުމުރުފުރާގެ ޓީމުތަކެވެ.
ކޮމެންޓް