ރިދަން އެކަޑެމީ ޗެމްޕިއަންޝިޕް 2026ގެ 17 އަހަރުން ދަށުގެ އުމުރުފުރާގެ ފައިނަލަށް ފްރެންޑްސް ފުޓްބޯލް ފެމިލީ އެކަޑެމީގެ އިތުރުން އުކުޅަސް ސްޕޯޓްސް އެކަޑެމީ ދަތުރުކޮށްފިއެވެ.
އއ. ތޮއްޑޫގައި ކުޅޭ އެ މުބާރާތުގެ ފައިނަލަށް އެ ދެ ޓީމު ދަތުރުކުރީ ސެމީ ފައިނަލް މެޗު ތަކުން މޮޅުވެގެންނެވެ. އެގޮތުން ފްރެންޑްސް ފުޓްބޯލް ފެމިލީ އެކަޑެމީން ވަނީ އެ ޓީމު ކުޅުނު ސެމީ މެޗުގައި ނިއު ސްޓާ ސްޕޯޓްސް އެކަޑެމީ 4-0 ގެ ނަތީޖާއަކުން ބަލިކޮށްފައެވެ.
މީގެ އިތުރުން އުކުޅަސް ސްޕޯޓްްސް އެކަޑެމީން ވަނީ ސެމީ މެޗުގައި ޔުނައިޓެޑް ވިކްޓްރީ ސްޕޯޓްސް އެކަޑެމީ ބަލިކޮށްފައެވެ. އުކުޅަސް ސްޕޯޓްސް އެކަޑެމީ މޮޅުވީ 1-0 ގެ ނަތީޖާއަކުންނެވެ.
ސެމީ ފައިނަލް މެޗުތަކުން މޮޅުވެ ފްރެންޑްސް ފުޓްބޯލް ފެމިލީ އެކަޑެމީއާއި އުކުޅަސް ސްޕޯޓްސް އެކަޑެމީ ބައްދަލުކުރާ ފައިނަލް މެޗު ކުޅެން ހަމަޖެހިފައިވަނީ މިއަދު ހަވީރު 16:15ގައެވެ.
ދެ އުމުރުފުރާއަކަށް ބަހާލައިގެން ކުރިއަށް ގެންދާ އެ މުބާރާތުގައި ރާއްޖޭގެ މަޝްހޫރު އެކަޑެމީތަކުން ވެސް ބައިވެރިވެއެވެ. އެގޮތުން މާލެއިން ބައިވެރިވެފައިވާ ޓީމުތަކުގެ ތެރޭގައި ޔުނައިޓެޑް ވިކްޓްރީ އެކަޑެމީއާއި ފްރެންޑްސް ފުޓްބޯލް ފެމިލީ އެކަޑެމީ ހިމެނެއެވެ. އއ. އުކުޅަހުން އެ މުބާރާތުގައި އުކުޅަސް ސްޕޯޓްސް އެކަޑެމީ ބައިވެރިވާއިރު އެ އަތޮޅު ރަސްދޫއިން އެ މުބާރާތުގައި ބައިވެރިވަނީ ރަސްދޫ ފުޓްބޯލް އެކަޑެމީއެވެ.
މީގެ އިތުރުން އައްޑޫ ސިޓީގެ ސަޑޭ ސްޕޯޓްސް އެކަޑެމީން ވެސް އެ މުބާރާތުގައި ބައިވެރިވެފައިވެއެވެ. ޅ. ނައިފަރުގެ މަޝްހޫރު އެޕެކްސް ސްޕޯޓްސް އެކަޑެމީން ބައިވެރިވާއިރު ކ. މާފުށީގެ ނިއު ސްޓާ އެކަޑެމީން ވެސް ވަނީ އެ މުބާރާތުގައި ބައިވެރިވެފައެވެ.
ލަންކާއިން އެ މުބާރާތުގައި ވާދަކުރާނީ ޖެޓްލައިނާސް އެކަޑެމީއެވެ. އަދި ތޮއްޑޫއިން އެ މުބާރާތުގައި ކުޅެނީ ރިދަން ސްޕޯޓްސް އެކަޑެމީއެވެ.
މިމަހުގެ 18 ވަނަ ދުވަހު ފެށި އެ މުބާރާތުގެ ގްރޫޕް ސްޓޭޖުގެ ގިނަ މެޗުތަކެއް މިހާރު ވަނީ ނިމިފައެވެ.
މިއަހަރުގެ މުބާރާތް ވެސް އެހެން އަހަރުތަކެކޭ އެއްގޮތަށް ހަތަރު އުމުރުފުރާއަށް ކުރިއަށް ގެންދިއުމަށް ވަނީ ހަަމަޖެހިފައެވެ. ނަމަވެސް މިއަހަރުގެ މުބާރާތް ކުރިއަށް ގެންދިއުމަށް ހަމަޖެހިފައިވަނީ ދެބަޔަކަށް ބަހާލައިގެންނެވެ.
އެ މުބާރާތުގެ ދެވަނަ ބައި ފަށަން ހަމަޖެހިފައިވަނީ ސެޕްޓެމްބަރު މަހުގެ 12 އިން 17 ވަނަ ދުވަހުގެ ނިޔަލަށެވެ. އެ މުބާރާތުގައި ވާދަކުރާނީ 10 އަހަރުން ދަށުގެ އުމުރުފުރާގެ އިތުރުން 12 އަހަރުން ދަށުގެ އުމުރުފުރާގެ ޓީމުތަކެވެ.
ކޮމެންޓް