މާލޭ ބޮޑުތަކުރުފާނު މަގު ޒަމާނީ ފެންވަރަށް ހެދުމުގެ މަޝްރޫއުގެ ތިން ވަނަ ފިޔަވަހީގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ފަށައިފި އެވެ.
އެމްޓީސީސީން މިއަދު ބުނީ އެ މަގު ހެދުމުގެ ފުރަތަމަ ފިޔަވަހީ (ސެގްމެންޓު 2 އިން ސެގްމެންޓު 5) ގެ މަސައްކަތުގެ ދަށުން ހޭންވޭރު ފެރީ ޓާމިނަލާއި މަސްވެރީންގެ ޕާކާ ދެމެދު އޮންނަ ޖެޓީ ސަރަހައްދުގައި ޝީޓް ޕައިލް ކުރުމުގެ މަސައްކަތް ފަށައިގެން ކުރިއަށް ގެންދާ ކަމަށެވެ.
މި މަސައްކަތް ނިމެންދެން މަސްވެރީންގެ ޕާކުން ފެށިގެން 5 ނަމްބަރު ފާލަމާ ހަމައަށް ހިމެނޭ ސަރަހައްދު ބަންދު ވާނެ އެވެ. މި މަހުގެ 30 އިން ފެށިގެން މަސައްކަތް ނިންމައި ސަރަހައްދު ހުޅުވެންދެން 5 ނަންބަރު ފާލަމުން ފެށިގެން އިއްޒުއްދީން ފާލަމާ ހަމައަށް ހިމެނޭ ސަރަހައްދު ބަންދު ވާނެ އެވެ. އަދި އޭޕްރީލް 17 އިން ފެށިގެން މަސައްކަތް ނިންމައި ސަރަހައްދު ހުޅުވެންދެން ބަންދު ވާނެ އެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީ ކުރުމަށް 144.5 މިލިއަން ރުފިޔާއަށް މި ސަރުކާރުން އެމްޓީސީސީއާ ހަވާލު ކުރީ 455 ދުވަސް ތެރޭގައި ނިންމުމަށެވެ.
އެ މަގު ފުޅާ ކުރުމުގެ މަޝްރޫއުގެ ފުރަތަމަ ސެގްމެންޓުގެ ދަށުން ރަސްމީ ފާލަމުން ފަށައިގެން މަސް މާރުކޭޓާ ހަމައަށް އެއްގަމުތޮޅި ބޭރަށް ޖައްސައި މަގު 4 ލޭނަށް ފުޅާކޮށް، ވަނީ ތާރު އަޅާފަ އެވެ. މީގެ އިތުރުން ދެ ވަނަ ސެގްމެންޓުގެ ދަށުން މަސް މާރުކޭޓު ސަރަހައްދުން ފަށައިގެން ނޯތް ހާބަރާ ހަމައަށް ވެސް ވަނީ ތަރައްގީކޮށްފަ އެވެ.
ކޮމެންޓް