މިހާރުގެ ރައީސް، ޑރ. މުހައްމަދު މުއިއްޒުގެ ސަރުކާރަށް ކުރަމުންދިޔަ ތާއީދު ހަޔާ އެޑިއުކޭޝަން މިނިސްޓްރީގެ ސީނިޔާ ޕޮލިޓިކަލް ޑިރެކްޓަރުކަމުން ދާދި ފަހުން ވަކިކުރި އައިޝަތު އީޝާ އަޝްރަފު މިއަދު އަނބުރާ ގެންގޮސްފި އެވެ.
އީޝާ ގެ ތާއީދު އަނބުރާ ގެންދިޔައީ މުއްދަތު ހަމަވެފައި އޮތް ކޯޓު އަމުރެއް ހިފައިގެން ފުލުހުން އައިސް އޭނާގެ ބައްޕަ ހައްޔަރުކޮށްގެން ގެންދިއުމުން، މިއީ އާރާއި ބާރު ނަހަމަ ގޮތުގައި ހިފާ ސަރުކާރެއް ކަމަށް ބުނެ އެވެ.
މިކަމާ ގުޅިގެން އީޝާ މިއަދު ކުރި އެކްސް ޕޯސްޓެއްގައި ބުނީ އިއްޔެއިން ފެށިގެން އޭނާގެ ބައްޕަ ވަނީ ހުޅުމީދޫ ފެނަކަ ބްރާންޗުގެ ޑިރެކްޓަރުކަމުން އިސްތިއުފާ ދީފައި ކަމަށެވެ.
އީޝާ ބުނިގޮތުގައި އެކަން ކުރާން މަޖުބޫރުވީ ސަރުކާރުން އޭނާގެ ބައްޕަގެ ބޮލުގައި ބޮޑު ތުހުމަތެއް އަޅުވައި އެކަން ސާބިތު ކުރަން ކޯޓަށް ގެންދިޔަ ހިސާބުންނެވެ.
"މާތްﷲގެ އިރާދަފުޅުން ބައްޕައަށް އިންސާފު ލިބިއްޖެ. އަދި ޕީއެންސީގެ ސަރުކާރަށް އަޅުގަނޑާ އަޅުގަނޑުގެ ބައްޕަ ކުރަމުން އައި ތާއީދު އަނބުރާ ގެންގޮސްފިން. ވަރަށް ސަލާމް،" އީޝާގެ ޕޯސްޓުގައި ބުނެފައިވެ އެވެ.
އީޝާ ބުނީ 13 މާޗުން 18 މާޗަށް ހަމަވެފައި އޮތް ކޯޓު އަމުރެއް ހިފައިގެން މި މަހުގެ 23 ވަނަ ދުވަހު މީދޫ، ފުލުހުން އޭނާގެ ގެއަށް ވަދެ މުޅި ގެ ބަލައި ފާސްކޮށް، ބައްޕަ ހައްޔަރުކޮށްގެން ދެންދިޔައީ ހެތްކެއް ނެތް ކަމެއްގައި ކަމަށެވެ. އަދި އިޝާ ވަނީ އެއީ ޒާތީ ކަމެއްގައި މަތިން އަންގައިގެން ކުރި ކަމެއްތޯ ސުވާލުކޮށްފަ އެވެ.
ހަޔާ އެޑިއުކޭޝަން މިނިސްޓްރީގެ އިތުރުން މި ސަރުކާރުގައި އީޝާ ވަނީ ރައީސް އޮފީހުގައި ވެސް މަސައްކަތްކޮށްފަ އެވެ.
ކޮމެންޓް