ޑެޕިއުޓީ ކޮމިޝަނާ އޮފް ޕޮލިސް (ރިޓަޔާޑް) އަބްދުއްޝަކޫރު އަބްދުﷲ އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.
ޝަކޫރު އަވަހާރަވުމާ ގުޅުވައިގެން ރައީސް ކުރެއްވި އެކްސް ޕޯސްޓެއްގައި ވިދާޅުވީ އެ ހަބަރު އަޑުއެއްސެވީ ފުން ހިތާމައާ އެކުގައި ކަމަށެވެ.
ރައީސް ވިދާޅުވީ ޝަކޫރަކީ ނޮވެންބަރު 3 ގެ އުދުވާނީ ހަމަލާއިން ރާއްޖެ ދިފާއު ކުރެއްވުމަށް ހިތްވަރާ އެކު ޖިހާދު ކުރެއްވި ދިވެހި ސިފައިންގެ ލަޝްކަރުގައި ހިމެނިވަޑައިގަތް، އަދި ރާއްޖޭގެ ޖަލުތަކުގެ ހާލަތާއި އިންތިޒާމުތައް ރަނގަޅު ކުރެއްވުމާއި، މަސްތުވާތަކެތީގެ ވަބާއިން ގައުމު ސަލާމަތް ކުރެއްވުމުގެ މަސައްކަތުގައި ވެސް އިސް ދައުރެއް އަދާ ކުރެއްވި ތަޖުރިބާކާރު، ހަރުދަނާ ދިވެހި ދަރިއެއް ކަމަށެވެ. އަދި މުޅި ހަޔާތްޕުޅުގައި ވެސް ގައުމު އިސް ކުރެއްވި އިހުލާސްތެރިއެއްގެ ގޮތުގައި އެ މަނިކުފާނު ސިފަ ކުރެއްވި އެވެ.
ރައީސް ޑރ. މުއިއްޒުގެ މެސެޖު ނިންމަވައިލައްވާފައިވަނީ މަރުހޫމް އަބްދުއްޝަކޫރު އަބްދުﷲ، މާތްﷲގެ ތަނަވަސް ރަހުމަތުގައި، ސުވަރުގޭގެ ދާއިމީ ނިއުމަތުގައި ލެހެއްޓެވުން އެދިވަޑައިގެން ދުއާ ދަންނަވަމުންނެވެ.
ކޮމެންޓް