ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާއި ރާއްޖޭގައި ހަރަކާތްތެރިވާ ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާއި ގުޅިގެން ކާރިސާތަކަށް ތައްޔާރުވުމާއި ރިސްކް ކޮމިއުނިކޭޝަނަށް ހާއްސަކޮށްގެން "ހުޝިޔާރު" ގެ ނަމުގައި ވެބްސައިޓެއް ތައާރަފުކޮށްފި އެވެ.
ހުޝިޔާރު ކެމްޕެއިންގެ އެންމެ މުހިންމު އެއް މަގުސަދަކީ ކާރިސާތަކާ ގުޅޭ ގޮތުން މުޖުތަމައުގެ ހޭލުންތެރިކަން އިތުރު ކުރުމެވެ.
ހުޝިޔާރު ވެބްސައިޓަކީ (hushiyaaru.mv) މުޖުތަމައުއަށް މައުލޫމާތު ފޯރުކޮށްދޭ، ރައްކާތެރިކަން ކަށަވަރު ކުރުމަށް އެހީތެރިވެދޭ، ގިނަ ބަސްތަކަކުން އިންޒާރުގެ މެސެޖް ފޯރުކޮށްދޭ އަދި އަމަލީ ގޮތުން އަޅާނެ ފިޔަވަޅު ތަކުގެ މައުލޫމާތު ފޯރުކޮށްދޭ ޑިޖިޓަލް ޕްލެޓްފޯމެކެވެ.
މި ޕްލެޓްފޯމުން އަރައްކާތަކާއި ގުޅޭ އިރުޝާދުތަކާއި، ހޭލުންތެރިކަން އިތުރު ކުރުމުގެ ވީޑިއޯތަކާއި، ޑައުންލޯޑް ކުރެވޭ ޕޯސްޓަރުތަކާއި، ތައުލީމީ ދާއިރާ އަށް ބޭނުންވާ ފަންނީ މައުލޫމާތު ލިބެން ހުންނާނެ އެވެ. އަދި މި ޕްލެޓްފޯމް ފަސް ބަހަކުން ބޭނުން ކުރެވޭނެ އެވެ.
ޕްލެޓްފޯމް ފަރުމާ ކުރެވިފައި ވަނީ ހާއްސަ އެހީއަށް ބޭނުންވާ ފަރާތްތަކަށް ވެސް ފަސޭހައިން ބޭނުން ކުރެވޭ ގޮތަށެވެ.
ރަސްމީކޮށް "ހުޝިޔާރު" ވެބަސައިޓް ތައާރަފު ކޮށްފައި ވަނީ މި މަހުގެ 13 ވަނަ ދުވަހު ފާހަގަކުރި ބައިނަލްއަގުވާމީ ކާރިސީ ހިރާސް ކުޑަ ކުރުމުގެ ދުވަހާ ގުޅިގެން އެންޑީއެމްއޭ އިން އިސްނަގައިގެން ބޭއްވި "ވިލުންތެރި ފެސްޓު" ގަ އެވެ.
އެންޑީއެމްއޭ އިން ބުނީ ރާއްޖޭގެ ކާރިސާ ހިރާސް ކުޑަކުރުމުގެ އިސްތިރާޖު 2024-2030 ގައި ބަޔާންކޮށްފައިވާ 'އިޖާބަދިނުމަށް މުޖުތަމައު ބާރުވެރިކުރުވުން' މި މުހިންމު އަމާޒަށް ވާސިލުވުމަށް ޓަކައި ކާރިސާތަކަށް ތައްޔާރުވުމާއި، ކާރިސާތަކުން ލިބޭ ގެއްލުން ކުޑަކުރުމަށް އަޅަންޖެހޭ ފިޔަވަޅުތަކާ ބެހޭ މައުލޫމާތު ފޯރުކޮށްދެވޭ ހާއްސަ ވެބްސައިޓެއް މިއަދު ގާއިމު ކުރެވިގެން ދިއުމަކީ ފާހަގަ ކޮށްލެވޭ ކާމިޔާބީއެއް ކަމަށެވެ.
ކޮމެންޓް