ށ. މަރޮށި ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު އެމްޓީސީސީއާ ހަވާލުކުރުމުގެ ރަސްމިއްޔާތު އިއްޔެ އެ ރަށުގައި ބާއްވައިފި އެވެ.
ރައީސް ޑރ. މުހައްމަދު މުއިއްޒު ޝަރަފުވެރިކޮށްދެއްވި އެ ރަސްމިއްޔާތުގެ ތެރެއިން ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ހައުސިން މިނިސްޓްރީގެ ސްޓޭޓް މިނިސްޓަރު ހަސަން ރަޝީދު އެވެ. އެމްޓީސީސީގެ ފަރާތުން ކުންފުނީގެ މެނޭޖިން ޑިރެކްޓަރު އަހުމަދު ސައުދީ އެވެ.
މި މަޝްރޫއުގެ ދަށުން 14.50 ހެކްޓަރުގެ ސަރަހައްދެއްގެ ބިން ހިއްކުމާއި 669 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި 389 މީޓަރުގެ ސަރަހައްދެއްގައި ގްރޮއިންޖެހުމުގެ މަސައްކަތް ކުރާނެ އެވެ.
މި މަޝްރޫއަކީ 148.57 މިލިއަން ރުފިޔާއަށް 360 ދުވަސްތެރޭ ނިންމަން އެމްޓީސީސީއާ ހަވާލުކޮށްފައިވާ މަޝްރޫއުއެކެވެ.
އެމްޓީސީސީން ބުނީ 998 މީހުންގެ އާބާދީއެއް އޮންނަ މަރޮއްޓަކީ ފަރުމަސްވެރިކަމާއި ގެސްޓް ހައުސް ވިޔަފާރި އާއި ފަންގި ވިނެގެން އާމްދަނީ ހޯދާ ރައްޔިތުންތަކެއް ދިރިއުޅޭ ރަށެއް ކަމަށާއި މި ރަށުގެ ބިން ހިއްކައި ނިމުމުން ގޯތިގެދޮރު އެޅުމަށާއި ގެސްޓް ހައުސް ވިޔަފާރި ކުރުމަށް އިތުރު ބިން ރަށުން ލިބޭނެ ކަމަށެވެ.
މިއީ ރަށުގެ އިގުތިސާދީ އަދި އިޖުތިމާއީ ތަރައްގީއަށް މަގުފަހިވެގެންދާނޭ ކަމެއް ކަމަށާއި މީގެ އިތުރުން މި ރަށަކީ ރަށްގިރުމުގެ މައްސަލަ ވަރަށް ބޮޑުވެފައިވާ ރަށެއް ކަމަށާއި އެކަމުގެ ސަބަބުން ރަށުގެ ހޭޅިފަށަށް ބޮޑެތި ގެއްލުންތަކެއް ލިބެމުންދާ ކަން އެމްޓީސީސީން ފާހަގަކުރެ އެވެ.
ވޭތުވެދިތަ ދެ އަހަރެއްހާ ދުވަހުގެ ތެރޭގައި 30 ރުއް ވަނީ ވެއްޓިފައިވާ ކަމަށާއި މިއީ ފަންގިވިނެގެން އާމްދަނީ ހޯދާ ރައްޔިތުންނަށް ވަރަށް ބޮޑަށް ގެއްލުންވާ ކަމެއް ކަމަށް ވެސް އެ ކުންފުނިން ބުނެ އެވެ.
އެހެންކަމުން ގޮނޑުދޮށް ހިމާޔަތް ކުރުމުގެ މަޝްރޫއުގެ މަސައްކަތް ނިމުމާއެކު ރަށް ގިރުމުގެ މައްސަލައަށް ބޮޑު ހައްލެއް ލިބި ރައްޔިތުންނަށް ރަށްގިރުމުގެ ނުތަނަވަސްކަމުން ބޮޑު ތަސައްލީއެއް ލިބިގެންދާނެ ކަމަށް އެމްޓީސީސީން ބުނެފައިވެ އެވެ.
ކޮމެންޓް