މިދިޔަ ޖުލައި މަހު މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ލިބޭނެ ކަމަށް ލަފާކުރި އާމްދަނީއަށްވުރެ އެ މުއްދަތުގައި ލިބުނު އާމްދަނީ 16.4 އިންސައްތަ އިތުރުވެއްޖެ ކަމަށް މީރާއިން އާންމުކޮށްފައިވާ ހިސާބުތަކުން ދައްކައިފިއެވެ.
މީރާއިން އާންމުކޮށްފައިވާ ޖުލައި މަހުގެ ހިސާބުތައް ދައްކާގޮތުން އެ މުއްދަތުގައި އެ އިދާރާއަށް 2.93 ބިލިއަން ރުފިޔާގެ އާމްދަނީއެއް ލިބިފައިވެއެވެ. ނަމަވެސް މިއީ މިދިޔަ އަހަރުގެ ޖުލައި މަހާ އަޅާބަލާއިރު 17.1 އިންސައްތަ ދަށް އަދަދެކެވެ.
މި އަހަރުގެ ޖުލައި މަހު މީރާއަށް ލިބުނު އާމްދަނީ އިތުރުވި ސަބަބުތަކުގެ ތެރޭގައި ސެކަންޑް އިންޓަރިމް ބޭންކު އިންކަމް ޓެކްސް ދެއްކުން އަވަސްވުމާއި، 2024 ވަނަ އަހަރުގެ ޖޫން މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވުމާ ގުޅިގެން ފަތުރުވެރިކަމުގެ ދާއިރާއިން ލިބުނު އާމްދަނީ އިތުރުވުން ހިމެނެއެވެ. މީގެ އިތުރުން ފަތުރުވެރިކަމަށް ދޫކޮށްފައިވާ ބިންތަކުން ލިބެންޖެހޭ އާމްދަނީގެ ބޮޑު ބައެއް ލިބުމަކީވެސް އާމްދަނީ އިތުރުވުމަށް މަގުފަހިވި ކަމެކެވެ.
މީރާއަށް މިދިޔަ މަހު އެންމެ ބޮޑު އާމްދަނީއެއް ލިބިފައިވަނީ އިންކަމް ޓެކްސްގެ ގޮތުގައެވެ. މީރާގެ ހިސާބުތަކުން ދައްކާގޮތުގައި ޖުމްލަ އާމްދަނީގެ 50 އިންސައްތަ ހިއްސާކުރަނީ އިންކަމް ޓެކްސްއިން ލިބުނު އާމްދަނީއެވެ.
އެގޮތުން، އިންކަމް ޓެކްސްގެ ގޮތުގައި ޖުލައި މަހު 1.4 ބިލިއަން ރުފިޔާ ލިބުނެވެ. ދެން އެންމެ ބޮޑު އާމްދަނީއެއް ލިބުނީ ޖީއެސްޓީ އިންނެވެ. ޖުމްލަ އާމްދަނީގެ 33.33 އިންސައްތަ ހިއްސާކުރާ ޖީއެސްޓީން 977 މިލިއަން ރުފިޔާ ލިބުނެވެ.
ޖުމްލަ އާމްދަނީގެ 3.96 އިންސައްތައަކީ ޓޫރިޒަމް ލޭންޑް ރެންޓުން ލިބުނު 116 މިލިއަން ރުފިޔާއެވެ. އެއާޕޯޓު ޑިވެލޮޕްމަންޓް ފީގެ ގޮތުގައި ލިބުނު 77 މިލިއަން ރުފިޔާއަކީ ޖުމްލަ އާމްދަނީގެ 2.65 އިންސައްތައެވެ. އަދި ޑިޕާޗަރ ޓެކްސްގެ ގޮތުގައި 75 މިލިއަން ރުފިޔާ ލިބިފައިވާއިރު، އެއީ ޖުމްލަ އާމްދަނީގެ 2.56 އިންސައްތައެވެ. މީރާގެ ހިސާބުތައް ދައްކާގޮތުން ޖުލައި މަހު އެ އިދާރާއަށް ޑޮލަރުން ލިބުނު އާމްދަނީއަކީ 75.77 މިލިއަން ޑޮލަރެވެ.
ކޮމެންޓް