ކްރިސްޓަލް ޕެލަސް އާއި ވާދަކޮށް ލިވަޕޫލު މޮޅުވިއިރު، އެސްޓަން ވިލާ އާއި އެއްވަރުވެ މެންޗެސްޓާ ޔުނައިޓެޑް އިނގިރޭސި ޕްރިމިއަ ލީގުގެ ރެލިގޭޝަން ޒޯނަށް ވެއްޓިއްޖެއެވެ.
ޕެލަސްގެ އަމިއްލަ ދަނޑުގައި ކުޅުނު މި މެޗު ލިވަޕޫލުން ކާމިޔާބުކުރީ 1-3 ގެ ނަތީޖާއަކުންނެވެ. މި މޮޅާއެކު ލިވަޕޫލު ހަތަރު ވަނައިގައި އޮތީ 10 މެޗުން ލިބުނު 18 ޕޮއިންޓާއެކުއެވެ.
ލިވަޕޫލުން މެޗުގައި ލީޑުނެގީ ފުރަތަމަ ހާފުގައި އަލެކްސިސް މެކް އަލިސްޓާ ޖެހި ގޯލުންނެވެ. އަދި، ދެ ވަނަ ހާފުގައި، ލިވަޕޫލުން އިތުރު ދެ ލަނޑު ޖެހިއެވެ. މި ލަނޑުތައް ޖެހީ ފްލޯރިއަން ވާޓްޒް އާއި އަލެކްސަންޑަ އިސާކް އެވެ. މެޗުގައި ޕެލަސް އިން ޖެހި ލަނޑަކީ، ޕެނަލްޓީ އަކުން އެޑީ އެންކެޓިއޭ ޖެހި ގޯލެކެވެ.
ލީގުގައި މިރޭ އަމިއްލަ ދަނޑުގައި އެސްޓަން ވިލާއާ 4-4 އިން އެއްވަރުވެ، މެންޗެސްޓާ ޔުނައިޓެޑް ލީގުގެ ފުރަތަމަ 10 މެޗު ނިމުނުއިރު، މި ވަނީ ރެލިގޭޝަން ޒޯނަށް ވެއްޓިފަ އެވެ.
އެޓީމުން މިހާތަނަށް ކުޅުނު 10 މެޗުގެ ތެރެއިން އެއް މެޗުން މޮޅުވިއިރު، 8 މެޗުން ވަނީ މޮޅެއް ނުލިބި ނިންމާލާފައެވެ. ލީގުގެ 18 ވަނައިގައި އޮތް ޔުނައިޓެޑަށް 10 މެޗުން ލިބިފައިވަނީ އަށް ޕޮއިންޓެވެ.
ޔުނައިޓެޑްގެ އޯލްޑް ޓްރެފޯޑްގައި ކުޅުނު މެޗުގެ ހަތަރު މިނިޓް ތެރޭ ވިލާ އިން ދެ ގޯލުގެ ލީޑެއް ނެގިއެވެ. މި ލަނޑުތައް ޖެހީ އެލިސަން އާއި ނިކޮލަސް ޖެކްސަންއެވެ. ޔުނައިޓެޑުން ވަނީ ފުރަތަމަ ހާފު ނިމުމުގެ ކުރިން ދެ ލަނޑު ޖަހައި އެއްވަރުކޮށްފައެވެ. މި ލަނޑުތައް ޖެހީ ޕެނަލްޓީ އަކުން ބްރޫނޯ ފެނާންޑޭސް އާއި މި ސީޒަނުގައި ވިލާ ދޫކޮށް ޔުނައިޓެޑަށް ބަދަލުވި ޔޫރީ ޓީލަމަންސްއެވެ.
ވިލާ އިން ވަނީ ދެ ވަނަ ހާފުގައި ނުކުމެ އިތުރު ދެ ލަނޑު ޖަހައިފައެވެ. ވިލާގެ ތިން ވަނަ ލަނޑު ޖޯން މެކްގިން ކާމިޔާބުކޮށްދިން އިރު ހަރަތު ވަނަ ލަނޑުޖަހައި ލީޑު ނަގައިދިނީ ލެއޯން ގޮރެޓްޒްކާއެވެ. އޭގެ ފަހުން މެޗުގެ އިތުުރު ވަގުތުގައި، މެންޗެސްޓާގެ ޖޯޝުއާ ޒާކްޒީ ވަނީ ޔުނައިޓެޑަށް ލަނޑެއް ޖަހައިދީ އުންމީދެއް ހޯދައިދީފައެވެ. އަދި އޭގެ ފަހުން ޕެޓްރިކް ޑޯގޫ ވަނީ ލަނޑެއް ޖަހައި ޔުނައިޓަށް ނަތީޖާ އެއްވަރުކޮށްދީފައެވެ.
ކޮމެންޓް