ސާފް ޗެމްޕިއަންޝިޕް: ބޫޓާނާއި ލަންކާ އެއްވަރުވުމުން ބަންގާޅު ސެމީއަށް

ސާފް ޗެމްޕިއަންޝިޕް ފުޓުބޯޅަ މުބާރާތުގައި ބޫޓާނާއި ސްރީ ލަންކާ ބައްދަލުކުރި މެޗު 2-2 އިން އެއްވަރުވުމުން މުބާރާތް ހޯސްޓުކުރާ ގައުމު ކަމަށްވާ ބަންގްލަދޭޝް އަށް ސެމީ ފައިނަލްގެ ޖާގަ ކަށަވަރުވެއްޖެއެވެ.

ބަންގްލަދޭޝް އިން ސެމީގެ ޖާގައެއް ކަށަވަރުކުރި އިރު، މިއަދު ރާއްޖެ ބަލިކޮށް ޕާކިސްތާން ވެސް ވަނީ ސެމީގެ ޖާގައެއް ކަށަވަރުކޮށްފަައެވެ. ބޫޓާނުން ގްރޫޕް އޭގައި ކުޅުނު ފުރަތަމަ މެޗުގައި ބަންގްލަދޭޝް އަތުން އޮތީ ހަނިގޮތަކަށް 1-0 އިން ބަލިވެފައެވެ.

އެ ހާލަތުގައި ބޫޓާނުން މެޗަށް ނުކުތް އިރު، މިރޭވެސް އެޓީމުގެ ފަރާތުން ފެނުނީ ފުރަތަމަ މެޗުގައިވެސް ފެނުނު ކަހަލަ ޓެކްޓިކްސްއެކެވެ. ފަހަތުގައި މަޑުކޮށް ކައުންޓާގައި އެޓޭކް ކުރަން މަސައްކަތް ކޮށްފައިވާ އިރު، ލަންކާއިން ދިޔައީ ކުރިއަށް ޖެހިގެން ކުޅެމުންނެވެ. ނަމަވެސް ހާފުގެ 33 ވަނަ މިނެޓުގައި ޑާވާ ޝެރިންގެ ވަނީ ބޫޓާނަށް ފުރަތަމަ ފަހަރަށް ލީޑު ނަގައިދީފައެވެ.

ބޫޓާނުން މި ލަނޑު ޖެހިތާ ދެމިނެޓުވެސް ނުވަނީސް ލަންކާގެ އޮލިވާ ޖޭމްސް ކެލާޓް، ހާފުގެ މެދެއްހާ ހިސާބުން ފޮނުވާލި ބޯޅަ ގޯލަށް ވައްދާލައިގެން ވަނީ ނަތީޖާ ހަމަހަމަކޮށްފައެވެ. އަދި ހާފު ނިމުމުގެ ކުރިން ލަންކާގެ ވަސީމް ރަޒީކް ވަނީ އިތުރު ލަނޑެއްޖަހާ ލަންކާއަށް ލީޑު ފުޅާކޮށްދީފައެވެ.

މި ނަތީޖާގައި އޮވެ ދެވަނަ ހާފަށް ކުޅެން ނުކުމެ ބޫޓާނުން ވަނީ ކުރިއަށްޖެހި ގޭމްގެ ތެރެއަށް ވަދެފައެވެ. އެގޮތުން ލަންކާގެ ހާފަށް ބާރު ބޮޑުކުރަމުން އައިސް ލިބުނު ކޯނަރަކުން ލަންކާ ޑިފެންޑަރު އަތުގައި ބޯޅަ ޖެހުމުން ރެފްރީ ވަނީ ބޫޓާނަށް ޕެނަލްޓީއެއް ދީފައެވެ. ނަމަވެސް ޗެންޗޯ ފޮނުވާލި ޕެނަލްޓީ ތަޖުރިބާކާރު ކީޕަރު ސުޖަން ޕެރޭރާ އަތުގައި ޖެހިފައި ނުކުތް ވަގުތު ރިބައުންސް އަށް އަރާހުރި ޕެމަ ޒަންގޯ ފޮނުވާލުމުން އެފަހަރުވެސް ސުޖަންވަނީ އެ ބޯޅަ މަތަކޮށްފައެވެ.

މެޗުގައި ބޫޓާނުން ހަމަހަމަކުރީ 76 ވަނަ މިނެޓުގައެވެ. މި ލަނޑު ކާމިޔާބުކޮށްދިނީ ޕެނަލްޓީ މިސްކޮށްލި ޗެންޗޫ އެވެ.

މި ލަނޑަށްފަހު ލަންކާއިން ވަނީ ކުރިއަށްޖެހި ލީޑު ނަގަން މަސައްކަތްކޮށްފައެވެ. ނަމަވެސް މެޗު ނިމުނު އިރުވެސް ލަންކާއަށް ވަނީ ބޫޓާންގެ ޑިފެންސް ލައިން ފޫއަޅޫވާލެވޭ ގޮތް ނުވެފައެވެ.

މި މެޗުގެ ނަތީޖާއާ އެކު، ބަންގްލަދޭޝް އެއް ވަނައިގައި އޮތީ އެއް މެޗުން ތިން ޕޮއިންޓް ހޯދައިގެންނެވެ. ދެ ވަނައިގައި އޮތް ސްރީ ލަންކާ އަށް އެއް މެޗުން އެއް ޕޮއިންޓް ލިބިފައިވާއިރު، ތިން ވަނައިގައި އޮތް ބޫޓާނަށްވެސް ވަނީ ޕޮއިންޓެއް ލިބިފައެވެ. މި ގްރޫޕްގައި ބާކީ އޮތީ ބަންގްލަދޭޝް އާއި ލަންކާ ބައްދަލުކުރާ މެެޗެވެ. އެ މެޗުން ލަންކާ އިން ޕޮއިންޓެއް ހޯދިޔަސް ސެމީ ފައިނަލުން ޖާގަ ލިބޭނެ އެވެ. އެކަމަކު، ބަންގްލަދޭޝް އެ މެޗުން ދެ ގޯލުގެ ފަރަގަކުން މޮޅުވެއްޖެނަމަ، ބޫޓާނަށް ސެމީން ޖާގަ ލިބޭނެ އެވެ.