ޣައްޒާގެ ސްކޫލަކަށް ހަމަލާދީ 100 އަށްވުރެ ގިނަ މީހުން ޝަހީދުކޮށްލައިފި

ޣައްޒާ ސިޓީގެ ދަރަޖު ސަރަޙައްދުގައި ހުރި ސްކޫލަކަށް ޒަޔަނިސްޓް އިސްރާއީލުން ދިން ހަމަލާއެއްގައި މަދުވެގެން 100 މީހުން ޝަހީދުވެފައިވާ ކަމަށް ފަލަސްތީނުގެ ދައުލަތުގެ މީޑިއާއިން ރިޕޯޓުކޮށްފިއެވެ. މި ހަމަލާގައި އެތައް ބަޔަކު ޒަޚަމްވެފައިވާ ކަމަށްވެސް ވަނީ ބުނެފައެވެ.

ލޯކަލް މީޑިއާތަކުގެ ރިޕޯޓުތަކުން ދައްކާ ގޮތުގައި، ހަމަލާ ދިން ސްކޫލުގައި ގެދޮރު ގެއްލިފައިވާ ފަލަސްތީނުގެ އާންމު ރައްޔިތުން އަދިވެސް ބަންދުވެފައި ތިބިއިރު، އެ ސްކޫލުގައި ދަނީ އަލިފާން ރޯވަމުންނެވެ. ފެން ކަނޑާލާފައިވުމާއެކު، އަލިފާން ނިއްވުމަށް މަސައްކަތްކުރާ ފަރާތްތަކަށް ވަރަށް ބޮޑެތި ދަތިތަކާ ކުރިމަތިވެފައިވާ ކަމަށް އަލް ޖަޒީރާއިން ވަނީ ބުނެފައެވެ.

ޔަހޫދީ އިސްރާއީލުގެ ސިފައިން ބުނާ ގޮތުގައި މި ސްކޫލަކީ "ހަމާސްގެ މައި މަރުކަޒެއް" ގެ ގޮތުގައި ބޭނުންކުރަމުން އައި ތަނެކެވެ. އަދި އާންމުންގެ މަރުގެ އަދަދު މަތިވެފައިވީ ނަމަވެސް، އާންމުންނަށް ގެއްލުން ވާ މިންވަރު ކުޑަކުރުމަށް ފިޔަވަޅުތަކެއް އަޅާފައިވާ ކަމަށް އިސްރާއީލުން ބުނެއެވެ.

މި ހަމަލާއަކީ ޣައްޒާގައި ހިނގަމުންދާ ހަނގުރާމައިގެ ތެރެއިން ދެވުނު އެންމެ ނުރައްކާތެރި ހަމަލާތަކުގެ ތެރެއިން އެއް ހަމަލާ ކަމަށް ބެލެވެއެވެ. މި ހަމަލާއާ ގުޅިގެން ބައިނަލްއަޤްވާމީ މުޖުތަމަޢުން ވަނީ ކަންބޮޑުވުން ފާޅުކޮށްފައެވެ.

އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް މަދުވެގެން 39،700 މީހުން މަރުވެ، 91,722 މީހުން ޒަޚަމްވެފައިވެއެވެ.