ފެނަކަ ކޯޕަރޭޝަންގެ އިސް މަޤާމުތަކުގައި ތިބި ތިން ބޭފުޅަކު ވަކިކޮށްފި

ފެނަކައިގެ ޗެއަރމަން ކަމުން ވަކިކުރެއްވި އަޙްމަދު ޝަހީރު

ފެނަކަ ކޯޕަރޭޝަންގެ ޗެއަރމަންގެ އިތުރުން އެ ކުންފުނީގެ ބޯޑުގައި ހިމެނޭ ދެ މެންބަރަކު މަޤާމުން ވަކިކޮށްފިއެވެ.

އެނގިފައިވާ ގޮތުގައި މަޤާމުން ވަކިކޮށްފައިވަނީ ފެނަކައިގެ ޗެއަރމަން އަޙްމަދު ޝަހީރާއި، ޑެޕިއުޓީ މެނޭޖިންގ ޑިރެކްޓަރު އިބްރާހިމް ނާއިފުގެ އިތުރުން ޑިރެކްޓަރު އަޙްމަދު އީހާބެވެ.

މި ތިން ބޭފުޅުން މަޤާމުން ވަކިކުރި ނަމަވެސް، ސަރުކާރުން އަދި ޕްރައިވެޓައިޒޭޝަން ބޯޑު (ޕީސީބީ) އިން މިކަމާ ގުޅޭގޮތުން އެއްވެސް އެއްޗެއް ހާމަކޮށްފައެއް ނުވެއެވެ.

ފެނަކައިގެ ޗެއަރމަންކަމަށް ޝަހީރު އައްޔަންކޮށްފައިވަނީ މިދިޔަ ފެބްރުއަރީ މަހުގެ ތެރޭގައެވެ. އޭނާ ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2015 އިން 2018 އަށް އެސްޓީއޯގެ މެނޭޖިންގ ޑިރެކްޓަރުކަން ކުރައްވާފައެވެ.

ނާއިފު ފެނަކައިގެ ޑެޕިއުޓީ މެނޭޖިންގ ޑިރެކްޓަރުގެ މަޤާމަށް އައްޔަންކޮށްފައިވަނީ މިދިޔަ ޑިސެންބަރު މަހުގެ ތެރޭގައެވެ.

ފެނަކަ ފެނަކަ