ޢާއިލީ ގުޅުން ދެމެހެއްޓުމަކީ މިއަދު ޤައުމީ ފެންވަރުގައި އަޅާލަންޖެހިފައިވާ މުހިންމު މައްސަލައެއްކަމަށް، މިއަދުގެ ހުކުރު ޚުޠުބާގައި ފާހަގަކުރެވުނެވެ. މި ދީނީ އަދި އިޖުތިމާޢީ މަސްއޫލިއްޔަތު އަދާކުރުމަށްޓަކައި، ކަމާގުޅުންހުރި އެންމެހައި ފަރާތްތަކުން ގުޅިގެން މަސައްކަތްކުރުމުގެ މުހިންމުކަން ޚުޠުބާގައި އިސްކަމެއް ދެވުނެވެ.
އިސްލާމީ ކަންތައްތަކާބެހޭ ވުޒާރާގެ ޑެޕިއުޓީ މިނިސްޓަރު އަލްއުސްތާޛާ ޙައްވާ ލަޠީފް ތައްޔާރުކުރެއްވި މި ޚުޠުބާ ދިވެހިރާއްޖޭގެ މިސްކިތްތަކުގައި މިއަދު އިއްވުނެވެ. ޚުޠުބާގައި ޢާއިލީ ގުޅުން ދެމެހެއްޓުމުގެ މުހިންމުކަމަށް ޚާއްޞަ އަހައްމިއްޔަތުކަމެއް ދެވުނެވެ.
ޚުޠުބާގައި ފާހަގަކުރެވުނު ގޮތުގައި، އިންސާނިއްޔަތުގެ ތާރީޚުގައި ފުރަތަމަ އުފެދުނު ޖަމާޢަތަކީ ޢާއިލާއެވެ. އަދި ހަރުދަނާ މުޖުތަމަޢެއްގެ އަސާސަކީވެސް ޢާއިލާތަކެވެ. އެހެންކަމުން، ޢާއިލާއަކީ މުޖުތަމަޢުގެ ބިންގާކަމަށް ޚުޠުބާގައި ބަޔާންކުރެވުނެވެ. މި ބިންގާ ވަރުގަދަކުރެވިގެން މެނުވީ މުޖުތަމަޢު ބާރުވެރިއެއް ނުކުރެވޭނެކަމަށާއި، މިއަދު އިސްލާމީ އުއްމަތަށް ބޭނުންވެފައިވަނީ ބާރުވެރި އަދި ޣީރަތްތެރި މުޖުތަމަޢަކަށްކަން ޚުޠުބާގައި ފާހަގަކުރެވުނެވެ.
ޚުތުބާގައި ފާހަގަކުރެއްވި ގޮތުގައި، ޢާއިލާގެ ފަރާތުން ލިބެންޖެހޭ ރައްކާތެރިކަމާއި، އަޅާލުމާއި އަދި ލޯބިން މަޙްރޫމްވެފައިވާ އެތައް ކުޑަކުދިންނަކާއި ދޮށީ ޢުމުރުގެ މީހުން، މިހާރު ތިބީ ސަރުކާރުގެ ބެލުމުގެ ދަށުން ހިންގާ މަރުކަޒުތަކުގައެވެ. މިއީ ދީނީ އަދި އިޖްތިމާޢީ ގޮތުން ބަލާއިރު ކަންބޮޑުވާންޖެހޭ މައްސަލައެކެވެ. ސަބަބަކީ، ޢާއިލީ މާޙައުލެއްގައި އުފާވެރިކަމާއެކު ދިރިއުޅުމަކީ ކޮންމެ ފަރުދަކަށްމެ ލިބިގެންވާ އަސާސީ ޙައްޤެކެވެ.
އިތުރަށް ޚުތުބާގައި ބަޔާންކުރެއްވި ގޮތުގައި، ޢާއިލާގެ މެންބަރަކަށް ލިބެންޖެހޭ ޙައްޤަކުން އެއްވެސް މީހަކު މަޙްރޫމްކުރުމަކީ އިންސާނީ ކުރިމަގަށް ނޭދެވޭ އަސަރުތަކެއް ކުރާނެ ކަމެކެވެ. ޚާއްޞަކޮށް، ޢުމުރުން ދުވަސްވީ މީހުންނާއި، ޚާއްޞަ އެހީއަށް ބޭނުންވާ ފަރާތްތަކާއި، އަދި ނަފްސާނީ ދަތިތައް ދިމާވެފައިވާ މީހުން، އެމީހުންގެ ޢާއިލާގެ އަޅާލުމެއް ނެތި މިފަދަ މަރުކަޒުތަކުގައި ދިރިއުޅެން ޖެހުމަކީ އެފަރާތްތަކުގެ ނަފްސާނީ ދުޅަހެޔޮކަން އިތުރަށް ގޯސްވެދާނެ ކަމެކެވެ.
ކޮމެންޓް