ސަގާފީ ވާދައިގެ އެއްވަނަ އެކްސްޓްރީމް ލެވެލް ޑާންސް ގްރޫޕަށް

ދިވެހީންގެ އުފެއްދުންތެރި ކަމުގެ މައުރަޒުގައި ކުރިއަށްގެންދިޔަ ސަގާފީ ވާދަ މުބާރާތުގެ އެއްވަނަ އެކްސްޓްރީމް ލެވެލް ޑާންސް ގްރޫޕުން ހޯދައިފިއެވެ.

މިރޭ ހުޅުމާލޭ ސެންޓްރަލް ޕާކު ސްޓޭޖު ސަރަހައްދުގައި ކުރިއަށްދިޔަ ޝޯގެ ތެރެއިން ވަނީ ސަގާފީ ވާދައިގެ އެކި މަގާމުތަކަށް ހޮވުނު ޓީމުތަކަށް އިނާމު ހަވާޅުކޮށްފައެވެ.

އެކްސްޓްރީމް ލެވެލް ޑާންސް ގްރޫޕު ވެގެން ގޮސްފައި ވަނީ މިފަހުން ރާއްޖޭގައި ފެނިގެންދިޔަ މިފަދަ އެންމެ މޮޅު ކޮރެއޮގްރަފީ ފެނިގެންދިޔަ ގްރޫޕަށެވެ. ކޮންމެ ދުވަހަކުވެސް އެ ގްރޫޕުން ހުށަހަޅާދީފައިވާ ހަރަކާތްތަކުގައި ކޮންމެވެސް ކަހަލަ ވާހަކައެއް ނެށުމުގެ ތެރެއިން ގެނެސްދެއެވެ. ކުޅަދާނަ ފެހުންތެރިޔާ އަދި ޑާންސަރު ޖާދުﷲ ގެ މި ޑާންސް ގްރޫޕުގެ ނެށުންތައް ގެނެސްދީފައި ވަނީ ސީދާ އޭނާގެ ބެލުމުގެ ދަށުންނެވެ.

މިރޭ ލިބިގެންދިޔަ ވަނައާއެކު ސްޓޭޖުގައި ހުރެ ޖާދު ބުނީ މިއީ އަދި ފެށުމެއް ކަމަށާއި މިފަދަ ކިތަންމެ މުބާރާތެއް ރާއްޖޭގައި ބާއްވާތަން ދެކެން ބޭނުން ކަމަށެވެ. އޭނާ ބުނީ ދިވެހިންގެ ހުނަރު މިކަމުންވެސް ވަރަށް ބޮޑަށް ފެނިގެންގޮސްފި ކަމަށާއި އަދި މިއީ ވަރަށް ވާދަވެެރި މުބާރާތެއް ކަމަށެވެ. އެގޮތުން މި މުބާރާތުގައި އެކްސްޓްރީމް ލެވެލްއަށް ސަޕޯޓް ކޮށްދިން ހުރިހާ ފަރާތްތަކަށާއި ވަކިން ހާއްސަކޮށް އެ ގްރޫޕުގައި ފަހުރުވެރި އެއްވަނަ ހޯދުމަށް މަސައްކަތް ކޮށްދިން ހުރިހާ ބައިވެރިންނަށް އޭނާ ވަނީ ޝުކުރު އަދާކޮށްފައެވެ.

ސަގާފީ ވާދަ 2026 ގެ ޗެމްޕިއަން ޓީމަކަށް އެކްސްޓްރީމް ލެވެލް ޑާންސް ގްރޫޕު ހޮވުނުއިރު އެޓީމަށް ވަނީ 75،000 ރުފިޔާގެ ފައިސާގެ އިނާމެއް ލިބިފައެވެ. އަދި ދެވަނަ އަށް ދިޔަ އެމްއެންޔޫ ޑާންސް ގްރޫޕަށް 50،000 ރުފިޔާގެ ފައިސާގެ އިނާމު ލިބުން އިރު، ތިންވަނައަށް ދިޔަ ހިޔަލަ ޑާންސް ގްރޫޕަށް ވަނީ 25،000 ރުފިޔާގެ ފައިސާގެ އިނާމެއް ލިބިފައެވެ.

މި މުބާރާތުގެ އެންމެ މޮޅު ނެށުންތެރިއަކަށް ހޮވުނީ އެކްސްޓްރީމް ލެވެލް ޑާންސް ގްރޫޕުގެ ރިކްޒާ އެވެ. އަދި އެންމެ އުފެއްދުންތެރި ހުށަހެޅުމަކަށްވެސް ހޮވުނީ އެކްސްޓްރީމް ލެވެލްއެވެ. މީގެ އިތުރުން ފޭނުންގެ އެންމެ މަގުބޫލު ގްރޫޕަކަށްވެސް ހޮވުނީ ހަމަ އެކްސްޓްރީމް ލެވެލް ޑާންސް ގްރޫޕެވެ.