ދިވެހީންގެ އުފެއްދުންތެރި ކަމުގެ މައުރަޒުގައި ކުރިއަށްގެންދިޔަ “ބޮޑުބެރު ޗެލެންޖް 2026”ގެ ފަހުރުވެރި އެއްވަނަ ޖެހިޖެހިގެން ދެވަނަ ފަހަރަށް 1438 ބޮޑުބެރު ގްރޫޕުން ހޯދައިފިއެވެ.
ޖުމްލަ 10 ބޮޑުބެރު ގްރޫޕް ވާދަކުރި މި މުބާރާތުގައި ޖަޖުންގެ މާކުހާއި ބެލުންތެރިންގެ މާކުސް ހިމަނަައިގެން ގްރޫޕުތަކަށް މާކްސް ދީފައިވާއިރު، 1438 ބޮޑުބެރު ގްރޫޕު ވެގެން ގޮސްފައި މިވަނީ މިި ދެ އަހަރުވެސް ޖަޖުންގެ އެންމެ ގިނަ މާކްސް ލިބުނު ގްރޫޕަށެވެ.
ހުޅުމާލޭ ސެންޓްރަލް ޕާކުގައި މިރޭ ކުރިއަށްދިޔަ މި ހަރަކާތުގައި ބޮޑުބެރު ޗެލެންޖުގެ އިނާމު ދިނުމުގެ ކުރިން ވަނީ ރާއްޖޭގެ އެންމެ ފުރަތަމަ ބޮޑުބެރު ޗެލެންޖު ކާމިޔާބުކުރި ގްރޫޕު ކަމަށްވާ ހަރުބީ ބޮޑުބެރު ގްރޫޕުގެ ފޯރިގަދަ ލަވަތަކެއް ހުށަހަޅާދީފައެވެ.
މި އަހަރުގެ މުބާރާތުގެ އެއްވަނަ 1438 ބޮޑުބެރު ގްރޫޕު ހޯދުމާއެކު އެޓީމަށް ވަނީ ޗެމްޕިއަން ޓްރޮފީއާއެކު 75،000 ރުފިޔާގެ ފައިސާގެ އިނާމުވެސް ލިބިފައެވެ. މުބާރާތުގެ ދެވަނަ އަށް ހޮވުނީ ޗާލޭ ބޮޑުބެރު ގްރޫޕެވެ. އެ ގްރޫޕަށް ވަނީ 50،000 ރުފިޔާގެ ފައިސާގެ އިނާމެއް ދީފައެވެ. މި އަހަރުގެ މުބާރާތުގައި ތިންވަނައަށް ދެ ގްރޫޕެއް ހޮވިފައިވާއިރު، އެއީ މިދިޔަ އަހަރުވެސް ތިންވަނަ މަގާމު ހޯދި ލާމު ގަމަށް ނިސްބަތްވާ ރިދަމް ބޮޑުބެރު ގްރޫޕާއި، މިދިޔަ އަހަރުގެ ދެވަނަ ކަމަށްވާ ހޭވައްލާ ބޮޑުބެރު ގްރޫޕެވެ. މި ދެ ގްރޫޕުން ކޮންމެ ގްރޫޕަކަށްވެސް ވަނީ 25،000 ރުފިޔާގެ ފައިސާގެ އިނާމެއް ދީފައެވެ.
މި މުބާރާތުގައި ދެން ހޮވި މަގާމުތަކާއި ލިބުނު ފަރާތްތައް..
-
އެންމެ މޮޅު ބެރުވެރިޔާ އަދި އެންމެ އުފެއްދުންތެރި ލަވަ ހެދި ފަރާތް - ރިދަމް ބޮޑުބެރު ގްރޫޕުގެ އަބްދުﷲ ހަމްޒާ
-
އެންމެ މޮޅު ވޯކަލިސްޓް - 1438 ބޮޑުބެރު ގްރޫޕުގެ ޝަލަބީ އިބްރާހިމް / ޗާލޭ ބޮޑުބެރު ގްރޫޕުގެ އަހުމަދު އިބްރާހިމް (އައްމަޑޭ)
-
އެންމެ މޮޅު ނެށުންތެރިޔާ - ޗާލޭ ބޮޑުބެރު ގްރޫޕުގެ އިބްޝަރު އަހުމަދު
-
އެންމެ މޮޅު ޒުވާބު - ހޭވައްލާ ބޮޑުބެރު ގްރޫޕް (ރަންނަމާރި ލަވަ)
-
ބެލުންތެރިންގެ މެދުގައި އެންމެ މަގުބޫލު ބޮޑުބެރު ގްރޫޕް - ހޭވައްލާ ބޮޑުބެރު ގްރޫޕް (މިދިޔަ އަހަރުވެސް ހޭވައްލާ ވަނީ މި މަގާމު ހޯދާފަ)
-
އެންމެ އުފެއްދުންތެރި ލަވަ - 1438 ބޮޑުބެރު ގްރޫޕް
ކޮމެންޓް