އިންޝިއުރެންސް ޤާނޫނުގެ ސަބަބުން އިންވެސްޓަރުންގެ އިތުބާރު ރާއްޖެއަށް ލިބިގެންދާނެކަމަށް މަނަދޫ ދާއިރާގެ މެމްބަރު ޙުސްނީ މުބާރިކް ވިދާޅުވެއްޖެއެވެ.
ޙުސްނީ މިހެން ވިދާޅުވީ މިއަދުގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ.
“ތެދެންމެ އިންޝިއުރެެންސްގެ ވިޔަފާރި ރާއްޖޭގައި ހިންގަމުން އެބަދޭ. އެހެންނަމަވެސް އެފަދަ ވިޔަފާރިއެއް ހިންގަމުންދާއިރު ޤާނޫނަކުން ލިބިދޭންޖެހޭ ޙިމާޔަތާއި ރައްކާތެރިކަމެއް ނުލިބޭ. ހަރުދަނާ އިޤްތިޞާދެއް ބިނާކުރުމަށްޓަކައި ބޭންކިންގ ޤާނޫނެއް މުޙިއްމުވެގެންދޭ. ހަމައެފަދައިން އިންޝިއުރެންސް ޤާނޫނެއްވެސް މުޙިއްމުވެގެންދޭ. - ޙުސްނީ ވިދާޅުވިއެވެ.
މީގެ އިތުރުން މި ބިލްގައި ޕޮލިސީ ހޯލްޑަރުންގެ ހައްޤުތައް ރައްކާތެެރިކުރެވޭނެ ހަމަތައް ބަޔާންކޮށްފައިވާ ކަމަށާއި، އިންޝިއުރެންސްގެ ޤާނޫނެއް ވުޖޫދަށް ގެނެވޭ ޙާލަތުގައި އިންވެސްޓަރުންގެ އިތުބާރު ރާއްޖެއަށް ބޮޑުވެގެންދާކަމަށް ޙުސްނީ ފާހަގަ ކުރެއްވިއެވެ.
“ރާއްޖޭގެ ޤާނޫނީ ނިޒާމު ބައްޓަންވެފައި ހުރި ގޮތަކީ އިންވެސްޓަރުން ބަލަމުންދާ ކަންތައްތަކެއް - ޙުސްނީ ވިދާޅުވިއެވެ.
މިއަދު ރާއްޖޭގައި 5 ވަރަކަށް އިންޝުއަރެންސް ކުންފުނިތައް އެބައޮތެވެ. ނަމަވެސް މި ކުންފުނިތައް އޮތީ 80 ޕަސެންޓުގެ ބޭރުގެ ކުންފުނިތަކާއި ގުޅިފައި ކަމަށް މެންބަރު ވިދާޅުވިއެވެ. އެހެންކަމުން ޤާނޫނެއް ވުޖޫދުވެއްޖެ ނަމަ ދިވެހިންނަށް ހިމާޔަތް ލިބިގެންދާނެ ކަމަށް މެމްބަރުން ވަނީ ފާހަގަ ކުރައްވާފައެވެ.
ދުނިޔޭގެ އެހެން ގައުމުތަކާއި އަޅާބަލާއިރު ރާއްޖޭގައި އަދިވެސް ގެދޮރާއި މުދަލާއި މިތަކެތި އިންޝުއަރެންސް ކުރެވެން ނެތްކަމަށާއި، ބޮޑެތި ހާދިސާތައް ކުރިމަތިވެ ލިބޭ ގެއްލުންތައް ކަވާކުރުމަށް ގެދޮރާއި މުދާ އިންޝުއަރެންސް ކުރުމަށްޓަކައި މައުލޫމާތު ދީ ރައްޔިތުން ހޭލުންތެރިކުރަން ޖެހޭ ކަމަށްވެސް މި ބިލަށް ވާހަކަފުޅު ދެއްކެވި މެމްބަރުން ފާހަގަ ކުރެއްވިއެވެ.
ކޮމެންޓް