ޔޫކްރޭނުން ރަޝިޔާގެ ދެވަނައަށް އެންމެ ބޮޑު ސިޓީކަމުގައިވާ ސެންޓް ޕީޓާސްބާގަށް ދިން ވަރުގަދަ ޑްރޯން ހަމަލާތަކެއްގައި މަދުވެގެން އެކަކު މަރުވެ، އިތުރު ފަސް މީހަކު ޒަހަމުވެއްޖެ އެވެ.
އެ ސިޓީގެ ގަވަރުނަރު އެލެކްސަންޑްރާ ބެގްލޯވް މިއަދު ވިދާޅުވީ މި ހަމަލާތަކުގައި ސެންޓް ޕީޓާސްބާގް އޮއިލް ޓާމިނަލާއި، ރުޗީ އޮއިލް ޑިޕޯ، އަދި ސިޓީގެ ދެކުނުން އޮންނަ ކޮލްޕިނޯ ޑިސްޓްރިކްޓްގެ ސިނާއީ ގުދަންތަކެއްގައި ވަރަށް ބޮޑަށް އަލިފާންރޯވެފައިވާ ކަމަށެވެ. އަލިފާންނިއްވާ ފަރާތްތަކުން މިހާރު ދަނީ އަލިފާން ކޮންޓްރޯލްކުރުމުގެ މަސައްކަތް ކުރަމުންނެވެ.
ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވީ މީގެ އިތުރުން، ރޭގަނޑުގެ ވަގުތެއްގައި ރަޝިޔާއިން ޔޫކްރެއިނަށް ދިން ހަމަލާތަކެއްގައި ދެ މީހަކު މަރުވެފައިވާ ކަމަށެވެ.
ޒެލެންސްކީ އިތުރަށް ވިދާޅުވީ، ދެފަރާތުގެ މެދުގައި ހެދިފައިވާ ހަކަތައިގެ ވަސީލަތްތަކަށް ހަމަލާނުދިނުމުގެ އެއްބަސްވުމާ މޮސްކޯއިން އަދިވެސް ހިލާފުވަމުންދާ ކަމަށެވެ.
ރަޝިޔާގެ ޑިފެންސް މިނިސްޓްރީން ބުނާ ގޮތުގައި ޔޫކްރެއިންގެ ގިނަ ޑްރޯންތަކެއް ދިފާއީ ނިޒާމުން ވައްޓާލެވުނު ނަމަވެސް، މިސައިލްތަކުގެ ވެއްޓު ބައިތަކުން ޖެހި، ހަކަތައާ ބެހޭ މުހިންމު ވަސީލަތްތަކަށް ވަނީ ބޮޑެތި ގެއްލުންތަކެއް ލިބިފަ އެވެ.
ކޮމެންޓް