ލާމަރުކަޒީ ޤާނޫނަށް ބަދަލު ގެނައުމަކީ ކުޅިވަރަކަށް ހަދައިގެން ނުވާނެ - ލަތީފް

ލާމަރުކަޒީ ޤާނޫނަށް ބަދަލު ގެނައުމަކީ ސިޔާސީ ކަމަކަށް ހަދައިގެން ނުވާނެ ކަމަށް ދިއްދޫ ދާއިރާގެ މެމްބަރު ޢަބްދުއްލަތީފް މުޙައްމަދު (ފުނަމާ ލަތީފް) ވިދާޅުވެއްޖެއެވެ.

ލަތީފް މިހެން ވިދާޅުވީ މިއަދުގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ.

“މިއަދު އަޅުގަނޑުމެން އައިސް ކައުންސިލަރުންގެ އަދަދު މަދުކޮށްލާފަ ދިޔައީމަ ދެން އަންނަ ބަޔަކު ހިފަނީ އަނެއްކާ ގިނަ ކުރަން” - ލަތީފް ވިދާޅުވިއެވެ.

ކައުންސިލްތަކުގެ ސައިޒް ކުޑަކުރަން އެމަނިކުފާނަށް ފެންނަ ގޮތް ރައީސް ޑރ. މުހައްމަދު މުއިއްޒު ވަނީ އިއުލާން ކުރައްވާފައެވެ.

ރާއްޖޭގެ ކައުންސިލްތައް ކުޑަކުރުމަށް ގާނޫނަށް ގެންނަން ޖެހޭ ބަދަލުތައް ގެނައުމުގެ މަސައްކަތް ފައްޓަވާފައިވާ ކަމަށް ރައީސް ޑރ. މުއިއްޒު މި މަހުގެ ހަތް ވަނަ ދުވަހުގެ ވަނީ އިއުލާން ކުރައްވާފައެވެ.

ރައީސް ޑރ. މުއިއްޒު ވިދާޅުވީ ރާއްޖޭގެ ކައުންސިލްތައް ނުކަތާހާ ބޮޑުއިރު، އެ ކައުންސިލްތަކުގެ ސައިޒް ކުޑަ ކުރަން ޖެހޭ ކަމަށެވެ. ކައުންސިލްތަކުގެ ސައިޒް ކުޑަ ކުރުމަކީ ރައްޔިތުންގެ ބައިވެރިވުން ދޫކޮށްލަން ކުރާ ކަމެއް ނޫން ކަން ފާހަގަކުރައްވައި ރައީސް ވިދާޅުވީ ރަށްރަށުގައި ގިނަ އަދަދެއްގެ ކައުންސިލަރުންތަކެއް ތިބުމަކީ ވަރަށް ހަރަދު ހިނގާ ކަމެއް ކަމަށެވެ.

"މުޅި ދައުލަތުގެ ކަންކަން ނިންމަން ގައުމުގެ އިސްވެރިޔާގެ ގޮތުގައި މި ހޮވަނީ އެންމެ މީހެއް. އެހެންވީމަ، ރަށެއްގެ 300 މީހުން، 500 މީހުން، 1000 އެއްހާ މީހުންގެ ރަށެއްގައި ފަސް މީހުން، ހަތް މީހުން ހޮވުމަކީ ވަރަށް ހަރަދު ބޮޑު ކަމެއް." ރައީސް ވިދާޅުވިއެވެ.