ކުށްކޮށްގެން ހޯދާ މުދާ ދައުލަތަށް ނެގުމާބެހޭ ބިލު މަޖިލީހުން ބަލައިގެންފި

ޖިނާއީ ދައުވާއެއް ސާބިތު ނުވި ނަމަވެސް, ކުށްކޮށްގެން ހޯދާ މުދަލާއި ފައިސާ ދައުލަތަށް ނެގޭ ގޮތަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި “ކުށްކޮށްގެން ހޯދާ މުދަލާ ގުޅޭ ބިލު” މަޖިލީހުން މިއަދު ބަލައިގެންފި އެވެ.

މި ބިލަކީ މި މަހުގެ 6 ވަނަ ދުވަހު ސަރުކާރުގެ ފަރާތުން ފުވައްމުލަކު މެދު ދާއިރާގެ މެންބަރު އަލީ ފަޒާދު ހުށަހަޅުއްވި ބިލެކެވެ. މިބިލާއެކު ކުށްކޮށްގެން ހޯދި މުދާ ދައުލަތަށް ނެގުމަށްފަހު ވިއްކައި، އެ ކުށުގެ ސަބަބުން ގެއްލުން ލިބުނު މީހުންނަށް ބަދަލު ދެވިގެންދާނެ އެވެ.

މިއަދު ކުރިއަށްދިޔަ ރައްޔިތުން މަޖިލީހުގެ ޖަލްސާގައި ބަހުސްގެ މަރުހަލާއަށްފަހު، މި ބިލު މަޖިލީހަށް ބަލައިގަތުމަށް ފާސްކުރީ 56 މެންބަރުންގެ ވޯޓާއެކުއެވެ. އެއަށްފަހު އިތުރަށް ދިރާސާކުރުމަށް މި ބިލު ވަނީ ޖުޑިޝަރީ ކޮމިޓީއަށް ފޮނުވާފައެވެ.

މަޖިލީހަށް މި ބިލު ހުށަހަޅުއްވަމުން މެންބަރު ފަޒާދު ވިދާޅުވެފައި ވަނީ ރާއްޖޭގެ ގާނޫނީ އަދުލުގެ ނިޒާމު ޒަމާނުއްސުރެ ބައްޓަންވެފައި އޮތީ ކުށްކުރާ މީހުންނަށް ޖިސްމާނީގޮތުން އަދަބު ދެވޭ ގޮތަށް އެކަނި ކަމަށެވެ. ނަމަވެސް ބޮޑެތި ކުށްކުރާ މީހުން، އެ ކުށްކޮށްގެން ހޯދާ ފައިސާއިން ނަފާ ހޯދަމުންދާ ކަމަށާއި އެކަން ހުއްޓުވުން ކޮންމެހެން މުހިންމު ކަމަށެވެ.

އެ ބިލުގައި، މީހެއްގެ މައްޗަށް ކުށް ސާބިތުވުމާ ގުޅިގެން ކުށްކޮށްގެން ހޯދާފައިވާ މުދާ ދައުލަތަށް ނެގުމުގެ އިތުރުން، އިސްތިސްނާ ހާލަތްތަކެއްގައި ކުށް ސާބިތުނުވަނީސް ވެސް އެފަދަ މުދާ ދައުލަތަށް ނެގޭނެ އުސޫލުތައް ވަނީ ބަޔާންކޮށްފައެވެ. އެ ބިލު ގާނޫނަކަށްވުމުގެ ކުރިން ވެސް ކުށް ކޮށްގެން ހޯދާފައިވާ މުދާ ވެސް ދައުލަތަށް ނެގޭނެ ކަމަށް ބަޔާންކޮށްފައިވެއެވެ. ދައުލަތަށް މުދާ ނެގޭނެ ކުށްތަކުގެ ތެރޭގައި މަނީ ލޯންޑަރިންއާއި ޓެރަރިޒަމާ ގުޅުން ހުރި ކުށްތަކާއި، މީހަކު މެރުމާއި މަސްތުވާތަކެއްޗާއި، މީހުންނާއި ހަތިޔާރު ޓްރެފިކް ކުރުމާއި، އެކްސްޕްލޮއިޓޭޝަންގެ އަމަލު އެކުލެވޭ ޖިންސީ ކުށާއި، ކައުންޓަރފިޓްކުރުމާއި، ކޮރަޕްޝަނާއި އިންތިޒާމުވެގެން ކުރާ ބޮޑެތި ކުށްތައް ހިމެނެއެވެ.

މީގެ އިތުރުން ޓެކްސް ދެއްކުމުން އެއްކިބާވުމުގެ ކުށުގެ ތެރެއިން 500،000 ރުފިޔާއިން މަތީ ފައިސާގެ އަދަދު ހިމެނޭ ކުށްތަކާއި، ފޭރުމާއި ވައްކަމާއި ހިޔާނާތާއި މުދާ ސްމަގަލް ކުރުންފަދަ ކުށްތަކުގެ ތެރެއިން 100،000 ރުފިޔާއިން މަތީގެ ފައިސާގެ އަދަދު ހިމެނޭ ކުށްތަކާއި ޖިނާއީ ބޮޑު ކުށެއް ކަމުގައި ގާނޫނުގައި ކަނޑައަޅާފައިވާ ކުށްތަކުގެ ތެރެއިން ކުށްކޮށްގެން މުދާ ހޯދޭނެ ކޮންމެ ކުށެއްގައިވެސް ދައުލަތަށް މުދާ ނެގޭނެ ކަމަށް ބިލުގައި ވަނީ ބަޔާންކޮށްފައެވެ.

މި ބިލު ހުށަހެޅުމުގެ ބޭނުމަކީ ޖިނާއީ ބޮޑެތި ކުށްތައް ކުރާ ފަރާތްތަކުން އެފަދަ ކުށް ކޮށްގެން ހޯދާ މާލީ މަންފާގެ ބޭނުންކުރުން ހުއްޓުވުމެވެ.