ދަތުރުފަތުރުގެ އައު ހަމަޖެހުމެއް: ފްލައިޓްތަކާ ‘އާރު ޓީ އެލް’ ފެރީތައް ގުޅުވާލަނީ

ޤައުމީ އެއަރލައިން މޯލްޑިވިއަން އާއި އާރްޓީއެލް ގުޅިގެން، މޯލްޑިވިއަންގެ ފްލައިޓް ޝެޑިއުލްތަކާ އެއްގޮތަށް އާރްޓީއެލް ފެރީގެ ޚިދުމަތް ފޯރުކޮށްދިނުމުގެ މަސައްކަތް ފަށައިފިއެވެ.

މި މަޝްރޫޢާ ގުޅޭގޮތުން މަޢުލޫމާތު ދެމުން، މޯލްޑިވިއަންގެ ފަރާތުން ހާމަކުރި ގޮތުގައި، މާލެއިން ކޫއްޑޫއަށް ކޮންމެ ދުވަހަކު ހެނދުނު ދަތުރުކުރާ ޝެޑިއުލްޑް ފްލައިޓާ ދިމާކޮށް، ކޫއްޑޫއަށް އާރްޓީއެލް ފެރީ ޚިދުމަތް ލިބެން ހުންނާނެއެވެ. މީގެއިތުރުން، މޯލްޑިވިއަންއިން އިތުރަށް ފާހަގަކުރި ގޮތުގައި، މިއީ މި މަޝްރޫޢުގެ ފެށުމެއް ކަމަށާއި، މޯލްޑިވިއަންގެ ޝެޑިއުލްޑް ދަތުރުތައް ހަމަޖެހިފައިވާ ހުރިހާ އެއަރޕޯޓަކަށްވެސް މި ޚިދުމަތް ފުޅާކުރުމަށްޓަކައި، އާރްޓީއެލްއާ ގުޅިގެން މަސައްކަތްތަކެއް ކުރިއަށްދާ ކަމުގައި ބުންޏެވެ.

މޯލްޑިވިއަން އެއަރލައިންސްގެ Q2260 ފްލައިޓް މިހާރު ކޮންމެ ދުވަހަކު ކޫއްޑޫއަށް ދަތުރުކުރެއެވެ. މި ފްލައިޓް ކޫއްޑޫގައި ޖައްސަނީ ހެނދުނު 8:55 ގައެވެ. މި ފްލައިޓާ ގުޅުވައިގެން، ގއ. ކޫއްޑޫއިން ގއ. ވިލިނގިއްޔަށް ދަތުރުކުރާ އާރްޓީއެލް ފެރީ ޚިދުމަތް މިހާރު ހަމަޖެހިފައިވެއެވެ. މި ފެރީ ފުރާ ގަޑިއަކީ 9:30 އެވެ.

އެއަރޕޯޓުތައް ހިމެނޭ ބައެއް ސަރަޙައްދުތަކަށް އާރްޓީއެލް ފެރީގެ ޚިދުމަތް ފޯރުކޮށްދެމުންދާއިރު، އަނެއްބައި ސަރަޙައްދުތަކުގައި ފްލައިޓް ގަޑިތަކާއި ފެރީ ޝެޑިއުލްތައް ނުގުޅޭކަން އާންމުން ފާހަގަކުރެއެވެ.

ރާއްޖެ ޓްރާންސްޕޯޓް ލިންކް (އާރްޓީއެލް) ގެ ފެރީ ނިޒާމަކީ މުޅި ރާއްޖޭގެ ދަތުރުފަތުރުގެ ވިއުގަ އެއް ނިޒާމެއްގެ ދަށުން ގުޅުވާލުމަށް ކުރެވެމުންދާ މަސައްކަތެކެވެ.