ރާއްޖޭގެ ބްލެކް މާކެޓުގައި ޑޮލަރު ވިއްކުން ހުއްޓުވުމަށް ސަރުކާރުން އެޅި ފިޔަވަޅުތަކާ އެކު ޑޮލަރު ރޭޓު ދަށްވަމުން އެބަދާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވީ ކަޅު ބާޒާރުގައި ޑޮލަރު ވިއްކުން ހުއްޓުވުމަށް ސަރުކާރުން ފަށާފައިވާ މަސައްކަތަކުގައި ކުރިއެރުންތަކެއް ލިބެމުން އަންނަ ކަމަށެވެ.
"ސަރުކާރު އަޅުގަނޑުމެންނާ ހަވާލުވިއިރު ޑޮލަރު ހުރި ރޭޓަށް ވުރެ ދަށަށް ގޮސްފައިވާ ކަމަށް މައުލޫމާތު ލިބެނީ. މާނައަކީ ނިމިދިޔަ ސަރުކާރުގައި ހުރި މިންވަރަށް އެ ރޭޓާ ބޭންޑާ ހަމައިގައި ހުރި ކަމަށް މައުލޫމާތު ލިބޭ. އެއީ ވަރަށް ބޮޑު ކުރިއެރުމެއް،" ސައީދު ވިދާޅުވި އެވެ.
މިނިސްޓަރު ސައީދު ވިދާޅުވީ ބޭރު ފައިސާ މާރުކުރުމުގެ ލައިސަންސާ ހުއްދަތަކާ މުޅިން ހިލާފަށް ރަސްމީ ރޭޓުގެ ބޭރުން ފައިސާ މާރުކުރުމުގެ މައްސަލަ ވަރަށް މަޑުވެފައިވާ ކަމަށެވެ.
ސައީދު އިތުރަށް ވިދާޅުވީ ބޭރު ފައިސާއާ ބެހޭ ގާނޫނަށް ސަރުކާރުން ގެނައި ބަދަލުތަކާއި ބްލެކް މާކެޓް ހުއްޓުވުމަށް އެޅި ފިޔަވަޅުތަކާ އެކު މިހާރު ބްލެކް މާކެޓުގައި ބޭރު ފައިސާ ބޮޑު އަގުގައި ވިއްކާ އަގު ދަށްވަމުން އަންނަކަން ފާހަގަވާ ކަމަށެވެ
ކޮމެންޓް