ޖުލައި މަހު ފަތުރުވެރިންގެ އަދަދު 14 އިންސައްތަ އިތުރުވެއްޖެ

މިދިޔަ ޖުލައި މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 14 އިންސައްތަ އިތުރުވެއްޖެއެވެ. ޓޫރިޒަމް މިނިސްޓްރީން ހާމަކޮށްފައިވާ ތަފާސްހިސާބުތަކުން ދައްކާގޮތުގައި، ފާއިތުވި މަހު ރާއްޖެއަށް 160،000 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ ޖުލައި މަހާ އަޅާބަލާއިރު 20،000 ފަތުރުވެރިން އިތުރު އަދަދެކެވެ.

ފާއިތުވި ދެ މަހު މިިއަދަދުތައް ވަރަށް ބޮޑަށް ދަށްވުމަށްފަހު، ޖުލައި މަހު އަދަދުތައް އަނެއްކާވެސް އިތުރުވެފައިވާކަން ފާހަގަކުރެވެއެވެ. މިއަހަރުގެ ފުރަތަމަ ހަތް މަހުގެ ތެރޭގައި ރާއްޖެއަށް ޖުމްލަ 1.1 މިލިއަން ފަތުރުވެރިން ޒިޔާރަތްކޮށްފައިވެއެވެ. މިއީ 2023 ވަނަ އަހަރުގެ މި މުއްދަތާ އަޅާބަލާއިރު 9.6 އިންސައްތައިގެ ކުރިއެރުމެކެވެ.

ސަރުކާރުން މިއަހަރު ނިމުމުގެ ކުރިން 2 މިލިއަން ފަތުރުވެރިން ގެނައުމުގެ ލަނޑުދަނޑިއެއް ކަނޑައަޅާފައިވާއިރު، މި ލަނޑުދަނޑި ޙާޞިލުކުރުމަށްޓަކައި، މިއަހަރުގެ ބާކީ އޮތް މުއްދަތުގައި ކޮންމެ މަހަކު 180،000 ފަތުރުވެރިން ރާއްޖެއަށް ގެންނަން ޖެހޭނެކަމަށް ވަނީ ލަފާކޮށްފައެވެ.

މިހާތަނަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިން ކަމަށްވާއިރު، އެ ޤައުމުން 157،000 ފަތުރުވެރިން ޒިޔާރަތްކޮށްފައިވެއެވެ. ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިޔާއިން (125،000)، އަދި ތިންވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޔޫކޭއިން (104،000) ކަމަށް ތަފާސްހިސާބުތަކުން ދައްކައެވެ.