ތެލުގެ އަގު އަނެއްކާވެސް އުފުލިއްޖެ

އެމެރިކާއި އީރާނާ ދެމެދު އަސްކަރީ ގޮތުން ކުރިމަތިލުންތަކެއް ހިނގައި، ހަމަލާތައް ބަދަލުކުރަން ފެށުމާ ގުޅިގެން ބައިނަލްއަޤްވާމީ ބާޒާރުގައި ތެލުގެ އަގު ވަރަށް ބޮޑަށް މައްޗަށް ހިނގައްޖެއެވެ.

ބައިނަލްއަޤްވާމީ މީޑިއާތަކުން ރިޕޯޓްކޮށްފައިވާ ގޮތުގައި، މި ހަފުތާގެ ތެރޭގައި ތެލުގެ އަގަށް މި ބަދަލު އައީ އެމެރިކާއިން އީރާނަށް އަމާޒުކޮށް ހަމަލާތަކެއް ދިނުމާއި، އޭގެ ރައްދުގައި މެދުއިރުމަތީގެ ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް އީރާނުން ވަރުގަދަ ހަމަލާތަކެއް ދިނުމާ ގުޅިގެންނެވެ.

މި ނުތަނަވަސްކަމުގެ ސަބަބުން، ހަކަތައިގެ ބާޒާރު ދިރާސާކުރާ ފަރާތްތަކުން ހާމަކުރާ ގޮތުގައި ބްރެންޓް ކްރޫޑް ތެޔޮ ފީފާއަކުން 1.76 ޑޮލަރު ވަނީ ބޮޑުވެފައެވެ. އެއާއެކު މިހާރު ބްރެންޓް ކްރޫޑް ފީފާއެއްގެ އަގު ވަނީ 97.39 އެމެރިކާ ޑޮލަރަށް އަރާފައެވެ. މީގެއިތުރުން ޔޫއެސް ވެސްޓް ޓެކްސަސް އިންޓަމީޑިއޭޓް (ޑަބްލިޔު.ޓީ.އައި) ކްރޫޑުގެ އަގު 1.91 ޑޮލަރު މައްޗަށް ޖެހިލައި، މިހާރު ފީފާއެއް ވިއްކަމުން ދަނީ 92.92 ޑޮލަރަށެވެ. މިއީ ވޭތުވެދިޔަ ހަތަރު ދުވަހު ޖެހިޖެހިގެން ތެލުގެ އަގު މައްޗަށް ދިއުމަށްފަހު، މި ހަފުތާގައި އަގު އެންމެ އުސްމިނަކަށް ދިޔަ ފަހަރެވެ.

މެދުއިރުމަތީގެ މަސްރަޙު އިތުރަށް ގޯސްވަމުންދާއިރު، އިސްރާއީލުގެ ޑިފެންސް މިނިސްޓަރު އިސްރާއީލް ކެޓްޒް ވަނީ އީރާނުން އެ ޤައުމަށް އެއްވެސް ހަމަލާއެއް ދީފިނަމަ، އީރާނުގެ ތެލާއި ހަކަތަ އުފައްދާ މަރުކަޒުތައް ހިމެނޭ ގޮތަށް ގިނަ ތަންތަނަށް ހަމަލާދީ ބޮޑެތި ގެއްލުންތަކެއް ދޭނެކަމުގެ އިންޒާރު ވެސް ދީފައެވެ. މި އިންޒާރުތަކާއެކު ކުރިއަށް އޮތް ދުވަސްތަކުގައި ވެސް ތެލުގެ އަގު އިތުރަށް އުފުލިދާނެ ކަމުގެ ބިރު ވަނީ ބޮޑުވެފައެވެ.