ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް) ގެ ސެކްރެޓަރީ ޖެނެރަލް، ގޯލަމް ސަރުވަރު، ރައީސް ޑރ މުހައްމަދު މުއިއްޒުގެ އަރިހަށް ވަދާއީ ޒިޔާރަތެއް ކުރައްވައިފި އެވެ.
މި ބައްދަލު ކުރެއްވުން އޮތީ، މިއަދު ހެނދުނު ރައީސް އޮފީހުގަ އެވެ.
މި ބައްދަލުކުރެއްވުމުގައި، ސެކްރެޓަރީ ޖެނެރަލްގެ ދައުރުގައި އެމަނިކުފާނު ކޮށްދެއްވި އިހުލާސްތެރި ހިދުމަތްތަކާއި ދެއްވި އެއްބާރުލެއްވުމަށް ޓަކައި ރައީސް ޝުކުރު އަދާކުރެއްވި އެވެ. އަދި ސަރަހައްދީ އަދި ބައިނަލްއަގުވާމީ މައިދާނުގައި ސާކު އަދާކުރާ މުހިއްމު ދައުރުގެ މައްޗަށް އެމަނިކުފާނު އަލިއަޅުއްވާލެއްވި އެވެ.
މީގެ އިތުރުން، ސާކު ވަރުގަދަކުރުމަށް ދިވެހި ސަރުކާރުން ދޭ ސަމާލުކަން ތަކުރާރުކުރައްވައި، ސެކްރެޓަރީ ޖެނެރަލްގެ ހިންގުންތެރިކަމަށް ރައީސުލްޖުމްހޫރިއްޔާ ތަޢުރީފު ކުރެއްވިއެވެ.
މި ބައްދަލުކުރެއްވުމުގައި ސާކުގެ ސެކްރެޓަރީ ޖެނެރަލް ދެއްކެވި ވާހަކަފުޅުގައި، ރާއްޖޭގެ ފަރާތުން ލިބެމުންދާ ދެގޮތެއް ނުވާ އެއްބާރުލުމަށް ޓަކައި އިހުލާސްތެރިކަމާއެކު ޝުކުރު އަދާކުރެއްވި އެވެ.
އަދި ސާކް އުފެއްދި މެންބަރު ގައުމެއްގެ ހައިސިއްޔަތުން ރާއްޖެއަކީ، އެ ޖަމްއިއްޔާއަށް ނުހަނު މުހިއްމު ގައުމެއްކަން ފާހަގަކުރައްވައި، ޖަމްއިއްޔާގެ މަސައްކަތްތައް ހަރުދަނާ ކުރުމަށް ރައީސް ކުރައްވާ މަސައްކަތްޕުޅުތަކަށް ޝުކުރު އަދާކުރެއްވި އެވެ.
މި ބައްދަލުކުރެއްވުމުގައި، ރައީސް އާއި ސެކްރެޓަރީ ޖެނެރަލް ވަނީ، ސާކްގެ މުހިންމު މަސައްކަތްތަކަށް އަލިއަޅުއްވާލައްވައި، ސަރަހައްދީ ގުޅުން ބަދަހިކުރުމާއި، ކުރިއަށް އޮތް ތަނުގައި އެންމެން ގުޅިގެން ކުރިއެރުން ހޯދޭނެ މަގުތަކާ ބެހޭގޮތުން މަޝްވަރާ ކުރައްވާފަ އެވެ.
ބައްދަލުކުރެއްވުން ނިންމަވާލައްވަމުން، ރައީސް ޑރ. މުއިއްޒު ވަނީ، ސެކްރެޓަރީ ޖެނެރަލްގެ ކުރިމަގުގެ މަސައްކަތްތަކަށް ކާމިޔާބީއަށް އެދިވަޑައިގެންފަ އެވެ. އަދި މެންބަރު ގައުމުތަކުގެ މެދުގައި އޮންނަ ގާތްގުޅުން އިތުރަށް ބަދަހިކުރުމަށް މަސައްކަތް ކުރެއްވުމުގެ ޝައުހުވެރިކަން ވެސް އެމަނިކުފާނު ވަނީ ފާޅުކުރައްވާފަ އެވެ.
ރާއްޖެއަކީ ސާކު އުފެއްދުމުގައި ބައިވެރިވި ގައުމުތަކުގެ ތެރޭގައި ހިމެނޭ މެންބަރު ގައުމެކެވެ.
ސާކު ރަސްމީކޮށް އުފެދުނީ 8 ޑިސެމްބަރު 1985 ގައި ބަންގްލަދޭޝްގެ ޑާކާގައި ސާކް ޗާޓަރުގައި ސޮއިކުރުމާ ގުޅިގެންނެވެ.
ކޮމެންޓް