ސަރުކާރުގެ އަމާޒަކީ ވަޒީފާގެ ބާޒާރު މިހާރަށް ވުރެ އިތުރަށް ފުޅާ ކުރުމަށް މަސައްކަތް ކުރުން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މައި ކެރިއާ ޕޯޓަލް އިފްތިތާހުކޮށްދެއްވާ ވާހަކަ ދައްކަވަމުން މިނިސްޓަރު ވިދާޅުވީ ސަރުކާރުގެ އަމާޒަކީ ވަޒީފާގެ ބާޒާރުގައި އިތުރު ވަޒީފާތައް އުފައްދާ ވަޒީފާ ނެތް ފަރާތްތަކަށް ކެރިއާ ގައިޑެންސް އާއި ސްކިލްސް ޑިވްލޮޕްމަންޓްދީގެން ވަޒީފާގެ ބާޒާރަށް މީހުން ނެރުން ކަމަށެވެ.
ޒަމާނީ ޓެކްނޮލޮޖީގެ އެހީގައި އެއް ޕްލެޓްފޯމަކުން ވަޒީފާގެ ކަންކަން ބަލާލެވޭނެ ގޮތެއް ފާއިތުވި ދުވަސްތަކުގައި ފެންނަން ނެތްކަން ފާހަގަކުރައްވާ އިހުސާން ވިދާޅުވީ މަސައްކަތް ކުރައްވަނީ ލުއި ފަސޭހަކަމާއެކީ ހައްލު ގެނެވޭނެ ގޮތްތަކަކީ ކޮބައިތޯ ބެލުން ކަމަށެވެ. އެގޮތުން ނޭޝަނަލް ކެރިއާ ސާވިސް އިން މިއަދު ތައާރަފްވެގެން މިދާ މައި ކެރިއާ ޕޯޓަލްއަކީ މިދެންނެވި ހުރިހާ ކަންކަމަށް ކޮންމެވެސް ވަރެއްގެ ހައްލުތަކެއް ލިބިގެން ދާނެ ޕޯޓަލެއްކަން މިނިސްޓަރު ފާހަގަކުރެއްވި އެވެ.
"ވަޒީފާދޭ އަމިއްލަ ފަރާތްތަކާއި ދައުލަތުގެ އިދާރާތަކާއި އަދި ވަޒީފާ ހޯދަން އުޅޭ ފަރާތްތަކަށް އެއް ޕްލެޓްފޯމަކުން ފަސޭހަކަމާއެކު ގުޅުވާލެވޭނެ މަގެއް. ކެރިއާ ސާވިސް ބޭނުންވާ ފަރާތްތަކަށް ޕްރޮފެޝަނަލް އަދި ސީދާ އެކަމަށް ހާއްސަކުރެވިފައިވާ ފަރާތްތަކަށް ދޭ ކެރިއާ ގައިޑެންސް ލިބިގެންދާނެ ޕްލެޓްފޯމެއް މިއީ،" އިހުސާން ވިދާޅުވި އެވެ.
މައި ކެރިއާ ޕޯޓަލަކީ ރާއްޖޭގެ ވަޒީފާގެ ބާޒާރާއި، މުވައްޒަފުން ހޯދުމުގެ ނިޒާމުގެ އިތުރުން ކެރިއާ ޑިވެލޮޕްމަންޓްގެ ހިދުމަތްތައް އެއް ފުރާޅެއްގެ ދަށުން ފޯރުކޮށްދިނުމަށް ޓަކައި ފަރުމާކޮށްފައިވާ ޕޯޓަލެކެވެ.
ކޮމެންޓް