އިގްތިސާދަށް ހީނަރު އަސަރުތަކެއް ކުރި 4 ކްރައިސިސްއެއްގައި މަސައްކަތްކުރެވިއްޖެކަމަށާއި، އެންމެ ބޮޑު އަސަރެއް ރާއްޖޭގެ އިގްތިސާދަށްކުރީ މިހާރު ކުރިއަށްދާ ހަނގުރާމައިގެ ސަބަބުންކަމަށް އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.
މިރޭ އިގުތިސާދާބެހޭ ވުޒާރާއިން ކުރިއަށް ގެންދިޔަ ޕެނަލް ޑިސްކަޝަން “އިގްތިސާދުގެ ދެފަރާތް”ގައި ވާހަކަދައްކަވަމުން ޝިމާދު ވިދާޅުވީ، އޭނާއަށް އެންމެ ފުރަތަމަ މަސައްކަތް ކުރެވުނީ 2008 ވަނަ އަހަރުގެ މާލީ ކްރައިސިސްގައިކަމަށެވެ، އޭރު އޭނާއަކީ ފިނޭންސް މިނިސްތްރީގެ ދަރަންޏާ ބެހޭ ޑިޕާޓްމެންޓްގެ ހެޑުކަމަށެވެ.
އޭގެ ފަހުން ކޮވިޑް-19 ގެ އާލަމީ ވަބާގައި ވެސް މަސައްކަތްކުރެވުނު ކަމަށާއި އަދި އޭގެ ފަހުން ކުރިމަތިވި ޔޫކްރެއިން ރަޝިއާ ހަނގުރާމައިގައި ދިމާވި ކަރައިސިސްގައި ވެސް މަސައްކަތްކުރެވުނު ކަމަށް ޝިމާދު ވިދާޅުވިއެވެ.
އޭނާ ވިދާލުވީ އެ ހުރިހާ ކްރައިސިސްއަކަށް ވުރެ ބޮޑަށް މިހާރު މެދުއިރުމަތީގައި ކުރިއަށްދާ ހަނގުރާމައިގެ ސަބަބުން އިގްތިސާދަށް އަސަރުކޮށްފިކަމަށެވެ.
އެހެްންނަމަވެސް އޭގެ ހާލަތްތަކާއި މިހާރުގެ ހާލަތު ވަރަށް ބޮަޑަށް ތަފާތުކަމަށް ޝިމާދު ވިދާޅުވިއެވެ. މި ހަނގުރާމަ އިއުލާނުކުރިތަނުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކްރައިސިސް ކޮމިޓީއެއް އުފައްދަވާ ފުރަތަމަ ފިޔަވަޅު އެޅުއްވިކަމަށް ވެސް އޭނާ ވިދާޅުވިއެވެ.
ޝިމާދު ވިދާލުވީ ރާއްޖޭގެ ރައްޔިތުންނަށް މި ހައްސާސް އިގްތިސާދީ ދަތިތަކުގެ އަސަރު އެންމެ ބޮޑަށް ނުފޭރީ އެންމެ ފުރަތަމަ ދުވަހުން ފެށިގެން ރައީސް އެޅުއްވި ފިޔަވަޅުތަކުންކަމަށެވެ.
އިތުރަށް އޭނާ ވިދާޅުވީ މި ހަނގުރާމަ ފެށުމުގެ ކުރިން އެސްތީއޯއިން ތެޔޮ ގެނައުމަށް ކުއްޔަށް އުޅަނދެއް ދެ ލައްކަ ޑޮލަރަށް ލިބޭކަމަށެވެ. އެހެންނަމަވެސް ހަނގުރާމަ ފެށުމާއެކު އެ އަގު 9 ލައްކަ ޑޮލަރަށް އުފުލުނުކަމަށް ޝިމާދު ވިދާލުވިއެވެ.
އޭނާ ވިދާޅުވީ ތެލުގެ އަގު އުފުލި އެ ތެޔޮ ގެނައުމުގެ އަގު އުފުލުނު ނަމަވެސް ރައްޔިތުންނަށް އެކަމުގެ ތަކުލީފު އުފުލަން ޖެހުނު މިންވަރު ކުޑަކުރެވުނުކަމަށެވެ.
ކޮމެންޓް