ބޭންކު އޮފް މޯލްޑިވްސްއިން ކޮންމެ ދުވަހަކު އޭޓީއެމްތައް މެދުވެރިކޮށް 1.2 މިލިއަން ޑޮލަރު ނަގާކަމަަށް އެ ކުންފުނީގެ ހެޑް އޮފް ބްރޭންޑިން އެންޑް މާކެޓިން ސްޓެރެޓެޖީ މުހައްމަދު ސައީދު ވިދާޅުވެއްޖެއެވެ.
އިކޮނަމިކް މިނިސްޓްރީން ގެނެސްދިން އިގުތިސާދުގެ ދެ ފަރާތް ޕެނަލް ޑިސްކަޝަންގައި ވާހަކަދައްކަވަމުން ސައީދު ވިދާޅުވީ ބޭންކަށް ވިއްކާނީ އެ ބޭންކަށް ލިބޭ ޑޮލަރުގެ ނިސްބަތުންކަމަށެވެ.
އެ ބޭންކަށް ދުވާލަކު ޑޮލަރުން ޖަމާކުރަނީ އެންމެ 6 ލައްކަ ނުވަތަ 7 ލައްކަ ޑޮލަރުކަމަށް ވެސް ސައީދު ވިދާޅުވިއެވެ. ނަމަވެސް އެޓީއެމްތައް މެދުވެރިކޮށް 1.2 މިލިއަން ޑޮލަރު ނަގާކަމަށް ވެސް ސައީދު ވިދާޅުވިއެވެ.
އެހެންކަމުން ބޭންކަށް ޑޮލަރު ޖަމާކުރާ ނިސްބަތަށްވުރެ ޑޮލަރު އޭޓީއެމްތަކުން ނަގާ މިންވަރު 2 ގުނައަށް އިތުރުވެފައިވާކަމަށް ސައީދު ވިދާޅުވިއެވެ.
އޭނާ ވިދާޅުވީ ބޭންކަށް ޑޮލަރު ލިބެނީ 2 ގޮތަކަށްކަމަށެވެ. އެއީ ކަސްޓަމަރުން ޖަމާކުރާ ޑޮލަރާއި އެހެނިހެން ގޮތް ގޮތުން ބޭންކަށް ވިއްކުމަށް ލިބޭ ޑޮލަރުކަމަށެވެ. ބޭންކަށް ވިއްކުމަށް ލިބޭ ޑޮލަރު ލިބޭ ގޮތްގޮތުގެ ތެރޭގައި ހިމެނެނީ އެމްއެމްއޭއިން ކަސްޓަމަރުންނަށް ވިއްކުމަށް ދޫކުރާ ޑޮލަރާއި، އެ ބޭންކަށް މާރުކުރާ ޑޮލަރުގެ އިތުރުން އެ ބޭންކު މެދުވެރިކޮށް އެކިތަންތަނަށް ފައިސާ ދެއްކުމަށް ހޭދަކުރާ ޑޮލަރުކަމަށް ސައީދު ވިދާޅުވިއެވެ.
އޭނާ ވިދާޅުވީ މުޅި ރާއްޖޭގެ ބޭންކިން ނިޒާމުގެ ތެރެއިން ބޭންކަށް ޑެޕޮސިޓުކުރާ ފައިސާގެ ތެރެއިން 50 އިންސައްތައަށް ވުރެ ބޮޑު އިންސައްތައެއް ހުރީ ބީއެމްއެލްގައިކަމަށް ވީނަމަވެސް ޑެޕޮސިޓް ކުރާ ޑޮލަރު އެ ބޭންކަށް މާރުކުރުމުގެ ކުރިން އެ ބޭންކަށް އެ ޑޮލަރު ނުލިބޭކަމަށެވެ.
އިތުރަށް ސައީދު ވިދާޅުވީ ޑޮލަރުގެ ދަތިކަން ކުރިމަތިވުމުގައި މިހާރު ކުރާ ވިޔަފާރީގެ ސަބަބުން ތަކެތީގެ އަގު ބޮޑުވުން ވެސް ހިމެނޭކަމަށެވެ. ކުރިން ތަކެތި ގަތުމަށް ކަސްްޓަމަރުން ހޭދަކުރަންޖެހޭވަރަށް ވުރެ އިތުރަށް މިހާރު ހަރަދުކުރަންޖެހޭއިރު، އޭހާދަ ކުރަން ޖެހެނީ ޑޮލަރުންކަމަށް ވެސް އޭނާ ވިދާޅުވިއެވެ.
މީގެއިތުރުން ދިވެހިން އޮންލައިން ވިޔަފާރީގެ ތެރެއަށް ވަންނަ މިންވަރު އިތުރުވުން ވެސް ހިމެނޭކަމަށް ސައީދު ވިދާޅުވިއެވެ. އޭނާ ވިދާޅުވީ ކޮވިޑުގެ ކުރިން އެ ބޭންކުގެ ކާޑު ބޭނުންކޮށްގެން ބޭރުން ތަކެތި ގަންނަމުން ދިޔައީ 90 ހާހަކަށް ކަސްޓަމަރުންކަމަށެވެ. އެހެންނަމަވެސް މިހާރު ބީއެމްއެލްގެ ރުފިޔާ ކާޑު ބޭނުންކޮށްގެން ޑޮލަރުގެ މުއާމަލާތްކުރާ 2 ލައްކައެއްހާ ކަސްޓަމަރުން އެބަތިބިކަމަށް އޭނާ ވިދާޅުވިއެވެ
ސައީދު ވިދާޅުވީ އެ ބޭންކުން ޑޮލަރުގެ ތާށިކަން ހައްލުކުރުމަށް މަސައްކަތްކުރާކަމަށާއި، ވަރަށް އަވަހަށް އެކަންކަން ހައްލުކޮށް ކަސްޓަމަރުންނަށް ބޮޑެތި ލުއިތަކެއް ދޭނެކަމަށް ވެސް އޭނާ ވިދާޅުވިއެވެ.
ކޮމެންޓް