ދިވެހި ހައްޖުވެރިންނަށް ފޯރުކޮށްދޭ ހިދުމަތުގެ ފެންވަރު މަތި ކުރުމަށް މޯލްޑިވްސް ހައްޖު ކޯޕަރޭޝަނުން ކުރާ މަސައްކަތުގެ ދަށުން މައްކާ ހޮޓަލުގެ އާބާތުރަ ފިލުވައިފި އެވެ.
އެގޮތުން މައްކާ ހޮޓެލުގެ ހުރިހާ ކޮޓަރިތަކެއްގެ ކާޕެޓު ބަދަލުކޮށް، މޭޒާއި އެނދު ބަދަލުކޮށް، ފާހާނާތަކުގެ ޓައިލްސް ބަދަލުކުރުން ފަދަ ކަންކަން ވަނީ ކޮށްފަ އެވެ. ޖުމުލަ 355 ކޮޓަރީގެ ހޮޓަލުގެ ހުރިހާ ކޮޓަރިއަކަށް ވެސް ވަނީ ބަދަލުތަކެއް ގެނެސްފަ އެވެ.
ނިމިދިޔަ ރޯދަ މަހު އުމްރާއަށްފަހު މެނޭޖިން ޑިރެކްޓަރު މުހައްމަދު ޝަކީލް ވަނީ ހޮޓަލުގެ ވެރިފަރާތަށް ދަންނަވައިގެން މި ބަދަލުތައް ގެނައުމަށް ވަރަށް ބޮޑު އިސްކަމެއް ދެއްވާފަ އެވެ.
މީގެ އިތުރުން ހޮޓަލުގެ ލޮބީ އޭރިއާ އަށް ވެސް ބަދަލުތަކެއް ގެނެސްފައިވެ އެވެ.
އެ ބަދަލުތަކުގެ ތެރޭގައި ހާޖީން މަޑުކޮށްލައިގެން ތިބުމަށް ސޯފާތައް ވަނީ އައުކޮށްފަ އެވެ. އަދި ހާޖީންނަށް ދީނީ އަދި އެނޫން ވެސް އިރުޝާދުތައް ދިނުމަށް ކޮންފަރެންސް ހޯލެއް ވެސް މިހާރު ވަނީ ހޮޓަލުގައި ގާއިމު ކޮށްފަ އެވެ.
ހައްޖު ކޯޕަރޭޝަނުން ބުނެފައިވަނީ މި އަހަރު ވެގެން ދާނީ ރާއްޖޭގެ ތާރީހުގައި އެންމެ ފުރިހަމަ ހިދުމަތެއް ފޯރުކޮށްދެވޭނެ އަހަރަކަށް ކަމަށެވެ.
ރާއްޖެއިން ހައްޖާޖީން ފުރުމަށް ހަމަޖެހިފައިވަނީ މިމަހުގެ 15، 17، 18 އަދި 19 ވަނަ ދުވަހު އެވެ.
ކޮމެންޓް