މިއީ ޕީއެންސީގެ މެންބަރުންނާއި ސަޕޯޓަރުން މާސްޔޫސް ވާންވީ ވަގުތެއް ނޫން ކަމަށާއި މިއީ އުއްމީދު އާކޮށް ހިތްވަރާ އެކު ނުކުންނަންވީ ވަގުތު ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.
އަދުރޭ މި ގޮތަށް ވިދާޅުވީ މިދިޔަ މަހު ބޭއްވި ލޯކަލް ކައުންސިލް އިންތިހާބުގައި އއ. ހިމަންދޫން ވެރިކަން ކުރާ ޕީއެންސީއަށް ލިބުނު ކާމިޔާބީ ފާހަގަ ކުރުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ޖަލްސާގައި އަދުރޭ ވިދާޅުވީ މިއީ މަގުތައް މަތިންނާއި ކަންކަން މަތިން ދައްކާ ވާހަކައަށް ހެއްލެންވީ ވަގުތެއް ނޫން ކަމަށާއި އެ ވާހަކަތަކަށް ރައްދު ދޭނީ އަމަލާ ބަހުން ނަތީޖާ ނެރެގެން ކަމަށެވެ.
މަޖިލީހުގެ ރައީސް އަދުރޭ ވިދާޅުވީ 2028 ކާމިޔާކު ކުރުމަށް ޓަކައި ރައީސް ޑރ. މުހައްމަދު މުއިއްޒާއެކު ކަމަރު ބަންނަންވީ ވަގުތު އައިސް ޖެހިއްޖެ ކަމަށެވެ.
"އަޅުގަނޑުމެން ކުރަންވީ ކަމަކީ 2028 ރައީސް ޑރ. މުއިއްޒަށް، ޕީއެންސީއަށް ކާމިޔާބުކޮށްދިނުމަށް ޓަކައި ރާއްޖޭގެ ހުރިހާ ކަންކޮޅުތަކެއްގައި ތިބި ޕީއެންސީ ފިކުރުގެ އެންމެން މި ކަމުގައި ކަމަރު ބަންނަންވީ،" އަދުރޭ ވިދާޅުވި އެވެ.
އަދުރޭ ވިދާޅުވި ގޮތުގައި ޕީއެންސީގެ ފިކުރަނީ ގައުމީ ފިކުރެވެ. ތަރައްގީއާ އެއްބައިވަންތަކަމާއި ސުލްހަމަސްލަހަތުގެ ފިކުރެވެ.
"އަޅުގަނޑުމެންނަކީ 'ވޯޓުން' ބަލިވީމަ 'ކޯޓުން' ނަތީޖާ ނެރޭ ބައެއް ނޫން،" އަދުރޭ ވިދާޅުވި އެވެ.
އަދުރޭ އިތުރަށް ވިދާޅުވީ ޕީއެންސީއަކީ ރައްޔިތުންގެ ނިންމުން ބަލައިގަނެ، ރައްޔިތުންގެ ވިންދާއި ރޫހާ އެއްގޮތަށް ކުރިއަށް އޮތް ތަން ރާވަން އެނގޭ، ރާވަން ކެރޭ އަދި އެ ހިތްވަރު ހުރި ފިކުރެއްގެ ތެރެއިން އައިސް ތިބި ބައެއް ކަމަށެވެ.
ކޮމެންޓް